चास, ता. १३ ः खेड तालुक्यात ग्रामपंचायत निवडणुकांचे पडघम वाजले असून, सुमारे पंचवीस ग्रामपंचायतींच्या सार्वत्रिक निवडणुका, तर २१ ग्रामपंचायतींच्या ३२ रिक्त जागांच्या पोटनिवडणुकांचा कार्यक्रम जाहीर झाला आहे. त्यापैकी तालुक्याच्या पश्चिम पट्यातील मोरोशी, डेहणे, वाळद, एकलहरे, तिफनवाडी, धुवोली व भोमाळे या सात ग्रामपंचायतींच्या सार्वत्रिक निवडणुका, तर शेंदुर्ली, मोहकल, धामणगांव खुर्द, पापळवाडी या गावांमध्ये पोटनिवडणूक होणार असल्याने मतदारांची मात्र दिवाळीपूर्वीच दिवाळी साजरी होणार असल्याची चर्चा गावोगावी रंगू लागली आहे.

कोणतीही निवडणूक म्हटली की, पैशाचा धूर हा आलाच! कारण पैशाशिवाय निवडणुका हे केवळ स्वप्नच राहिले असून, निवडणुकीत पैशाला अतिशय महत्त्व प्राप्त झाले आहे. निवडणुका या दिवाळीपूर्वी होऊन निकालही दिवाळीपूर्वीच असल्याने प्रत्यक्षात या गावांमधील मतदार दोनदा दिवाळी अनुभवणार हे मात्र नक्की! शिवाय मुख्य दिवाळीही जोरदार साजरी होणार.

राज्यातील लांबणीवर पडलेल्या ग्रामपंचायतीच्या सार्वत्रिक निवडणुकांचे पडघम वाजल्याने इच्छुक उमेदवारांची आणि लोकमतातुन निवडून येणाऱ्या संरपचपदासाठी असणाऱ्या इच्छुकांची धावपळ वाढली आहे. सोमवार (ता.१६) ते शुक्रवार (ता. २० ऑक्टोबर) पर्यंत सकाळी ११ ते दुपारी ३ वाजेपर्यंत उमेदवारी अर्ज दाखल करता येणार आहे. सोमवार (ता.२३) उमेदवारी अर्जांची छाननी, बुधवार (ता. २५) दुपारी ३ वाजेपर्यंत माघारीची मुदत आहे व त्यानंतर चिन्ह वाटप होणार आहे. रविवार (ता. ५ नोव्हेंबर) सकाळी ७.३० ते सायंकाळी ५.३० वाजेपर्यंत मतदान होऊन सोमवारी (ता. ६ नोव्हेंबर) सकाळी मतमोजणी होऊन निकाल जाहीर होणार आहे.