माळशिरस, ता. २४ : पिंपरी (ता. पुरंदर) येथे कृषिभूषण महादेव शेंडकर यांनी बायोफॉल्क फिश फार्मिंग प्रकल्पाचे भूमिपूजन आपल्या शेतात केले. या प्रकल्पामध्ये आधुनिक तंत्रज्ञानाचा वापर करून कमी जागेत कमी पाण्यात मत्स्य पालन करून अधिक उत्पन्न घेतले जाते.
जमिनीत दोन मीटर उंचीचे शेततळे बनवून त्यामध्ये अति घनत्वामध्ये मत्स्यपालन केले जाते. रींग ब्लोअरच्या मदतीने हवेतील ऑक्सिजन पाण्यात मिक्स केला जातो तसेच माशांचे वेस्ट हे बॕक्टेरीयाच्या माध्यमातून बुजविले जाते व माशाचे वेस्ट हे रिसायकल करून पुन्हा फीड म्हणून वापरले जाते. यामुळे माशाच्या खाद्यावरील खर्च हा ३० टक्के कमी होतो. या प्रकल्पाचा एकूण खर्च ३० लाख रुपये आहे. पंतप्रधान मत्स्य संपदा योजने अंतर्गत केंद्र सरकार व राज्य सरकारने परवानगी दिली आहे.
हा प्रकल्प यशस्वी करण्यासाठी शेंडकर यांनी बिहार येथील पाटणा, मध्यप्रदेश येथील दत्तीया, रायगड, हिंजवडी आयटी पार्क पुणे अशा विविध ठिकाणे प्रशिक्षण घेतले आहे.
उद्‌घाटनप्रसंगी सोसायटीचे अध्यक्ष विजय थेऊरकर, माजी सरपंच मीना शेंडकर, उत्तम हंबीर, हरिश्चंद्र थेऊरकर, संपतदादा शेंडकर, पांडुरंग गायकवाड, सुखदेव हंबीर, बाबूराव शेंडकर, शंकरदादा शेंडकर, प्रवीण मारणे उपस्थितीत होते.

01260