इंदापूर, ता. ११ ः संत तुकाराम महाराज यांचा देहू ते पंढरपूर पालखी सोहळा इंदापूर येथील मुक्काम आटोपून गुरुवारी (ता.११) पहाटे पुणे जिल्ह्यातील शेवटचा मुक्काम असलेल्या सराटीकडे मार्गस्थ झाला. यावेळी इंदापूरकरांनी अतिशय भक्तिमय वातावरणात पालखीला निरोप दिला.

संत तुकाराम महाराज यांच्या देहू ते पंढरपूर पालखी सोहळ्याचे रिंगण बुधवारी (ता.१०) इंदापूर शहरातील कस्तुरबा कदम विद्यालयाच्या मैदानावर पार पडले. त्यानंतर औद्योगिक प्रशिक्षण संस्थेच्या प्रांगणात उभारण्यात आलेल्या भव्य शामियान्यात पालखी सोहळा मुक्कमासाठी विसावला. यादरम्यान इंदापूरकरांच्या पाहुणचाराने वैष्णवजन सुखावल्याचे सुखद चित्र पाहायला मिळाले. तसेच यंदा एकच दिवस मुक्काम असल्याने दर्शनासाठी मोठी गर्दी झाली होती. दर्शनासाठीची गर्दी रांग रात्री उशिरापर्यंत कायम होती. तर घरोघरी वारकऱ्यांच्या पाहुणचार करण्यात महिला भगिनी व्यस्त होत्या. तसेच प्रशासकीय भवन शेजारील मैदानावर पाळणे, खेळणी, विविध मनोरंजनाचे खेळामुळे संपूर्ण शहराला यात्रेचे स्वरूप आले होते.

दरम्यान विविध राजकीय पक्ष सामाजिक संघटना दानशूर व्यक्ती, शाळा महाविद्यालये यांच्यावतीने सार्वजनिक ठिकाणी वैष्णवांना अल्पोपाहार, पाणी बाटल्या, फळे, बिस्कीट पुढे, चहा, फराळाचे पदार्थ, अत्यावश्यक औषधे, कापडी पिशव्या यांचे वाटप केले. तर घरोघरी वैष्णवांना जेवणाच्या पंगती घातल्याचे चित्र पाहायला मिळाले. यामुळे इंदापूरकरांच्या पाहुणचाराने वैष्णवजन भारावून गेले होते. गुरुवारी पहाटे आरती करण्यात आली. त्यानंतर पालखी सोहळा पुणे जिल्ह्यातील शेवटचा मुक्काम असलेल्या सराटीच्या दिशेने मार्गस्थ झाला. या मार्गावरही ठिकठिकाणी पालखी सोहळ्याचे जोरदार स्वागत केले.

इंदापूरला यात्रेचे स्वरूप
इंदापूरमध्ये पालखी सोहळ्याला मोठ्या यात्रेचे स्वरूप प्राप्त झाले होते. या निमित्ताने बाह्यवळण मार्गालगत, प्रशासकीय इमारतीलगत मुलांसाठी पाळणे, मनोरंजनाचे स्टॉल, विक्रेते, यांची मोठी गर्दी होती. त्यास इंदापूरकरांनी चांगला प्रतिसाद दिला. यामध्ये पालखी सोहळ्यात अगदी लहानांपासून मोठ्यांपर्यंत पालखीदर्शनासह नागरिकांनी खरेदीचा आनंद लुटला. यामुळे मोठी आर्थिक उलाढाल झाल्याचे पाहायला मिळाले. मात्र, गेल्या वर्षीपासून पालखीचा मुक्काम शहराच्या बाहेर गेल्याने शहरातील मुख्य पेठेत शुकशुकाट पाहायला मिळाला.