तळेगाव ढमढेरे, ता. २ : तळेगाव ढमढेरे (ता. शिरूर) भोसेवस्ती येथील शेतकरी प्रदीपकुमार ऊर्फ संदीप बाळासाहेब ढमढेरे यांच्या शेतातील दीड एकर उसाला बुधवारी (ता. १) आग लागून उसाचे नुकसान झाले आहे. शेतातील विजेच्या तारांमुळे शॉर्टसर्किट होऊन उसाला आग लागल्याचे ढमढेरे यांनी सांगितले.
परिसरातील शेतकऱ्यांनी आग विझविण्याचा प्रयत्न केला. परंतु, तळेगाव ढमढेरे परिसरात उष्णतेची तीव्रता जास्त असल्यामुळे आग आटोक्यात आली नाही. आगीत ऊस जळून खाक झाला असून, तलाठी व महावितरणच्या अधिकाऱ्यांनी त्वरित पंचनामा करून नुकसान भरपाई द्यावी, अशी मागणी शेतकरी संदीप ढमढेरे यांनी केली आहे. दरम्यान, शेताच्या कडेला विद्युत खांब वाकलेला असल्यामुळे शेतात विद्युत तारा लोंबकळत आहेत. त्यामुळे शॉर्टसर्किट होऊन उसाला आग लागली आहे. वाकलेला विजेचा खांब त्वरित दुरुस्त करावा व तारांना ताण द्यावा, अशी मागणी ढमढेरे यांनी केली आहे.

तळेगाव ढमढेरे (ता. शिरूर) ः भोसेवस्ती येथील आगीत जळालेला ऊस.