वडगाव निंबाळकर, ता. १४ : कोऱ्हाळे बुद्रूक (ता. बारामती) येथील कापड दुकानातून रविवारी (ता. १२) रात्री सुमारे ६३ हजार रुपयांची कपडे अज्ञाताने चोरून नेली. याबाबत शरद गंगाधर कांबळे (रा. कांबळेवस्ती, कोऱ्हाळे बुद्रूक) यांनी फिर्याद दिली.

बारामती-नीरा रस्त्यालगत असलेल्या कापड दुकानाच्या मागील बाजूचा पत्रा कापत आतमध्ये प्रवेश करत चोरट्यांनी कापड दुकानातील कपडे चोरून नेले. दिवसभर दुकानाचे कामकाज पाहिले. रात्री कपडे विक्रीचा हिशोब करत ६ हजार २४० रुपयांची रक्कम पेटीत ठेवून दुकान बंद करून ते घरी गेले. दरम्यान, ता. १३ रोजी सकाळी त्यांना शेजारील दुकानदाराने तुमच्या दुकानातील साहित्य बाहेरील बाजूला अस्ताव्यस्त पडले असल्याचे फोनद्वारे कळविले. कांबळे यांनी येथे येत पाहणी केली असता दुकानाच्या पाठीमागील बाजूला कपड्यांचे रिकामे बॉक्स दिसून आले.
दुकानाची पाहणी केली असता पाठीमागील बाजूचा पत्रा कोणी तरी उचकटून कापून काढत आतील बाजूचे प्लायवूड तोडत दुकानात प्रवेश केला. दुकानात ठेवलेल्या रकमेसह लहान मुलांची विविध मापाची कपडे, मोठ्या मुलींची कपडे, अंडर गारमेंटस तसेच ६४ साड्या चोरीला गेल्याचे दिसून आले.