चित्रपट महोत्सवात ‘रेखा’ सर्वोत्कृष्ट
पुणे ः अण्णा भाऊ साठे आंतरराष्ट्रीय चित्रपट महोत्सवात शेखर रणखांबे दिग्दर्शित ‘रेखा’ चित्रपटाने सर्वोत्कृष्ट चित्रपटाचा मान पटकावला. सर्वोत्कृष्ट दिग्दर्शक अमर देवकर (चित्रपट ‘पदडा’), सर्वोत्कृष्ट अभिनेता तेजस इंदापूरकर (‘वुंग वुंग’), सर्वोत्कृष्ट अभिनेत्री माया पवार (‘रेखा’) सर्वोत्कृष्ट पटकथा स्वप्निल शेटे (‘तळ’) यांनाही पुरस्कार मिळाले. राष्ट्रीय चित्रपट संग्रहालयात हा महोत्सव पार पडला. पारितोषिक वितरण अभिनेत्री हेमांगी कवी यांच्या हस्ते झाले. याप्रसंगी आयोजक संदीप ससाणे उपस्थित होते.
---
विशेष मुलांची नाट्य स्पर्धा गुरुवारी
पुणे ः नवक्षितिज संस्थेने विशेष मुलांसाठी ‘डॉ. नीलिमा देसाई करंडक’ नाट्य स्पर्धा आयोजित केली आहे. गुरुवारी (ता. १२) सकाळी ९ ते दुपारी ४ या वेळेत सदाशिव पेठेतील भरत नाट्य मंदिर येथे स्पर्धा होईल. विशेष मुलांना व्यासपीठ उपलब्ध करणे तसेच त्यांच्या कलागुणांना प्रोत्साहन मिळावे म्हणून ही स्पर्धा घेतली जाते. स्पर्धेचे हे १४ वे वर्ष आहे. या मुलांना प्रोत्साहन देण्यासाठी रसिकांनी उपस्थित राहावे, असे आवाहन संयोजकांनी केले आहे.
----
‘माझा जीवनप्रवास’ पुस्तकाचे प्रकाशन
पुणे ः अरविंद देशमुख लिखित ‘माझा जीवनप्रवास’ या पुस्तकाचे प्रकाशन नुकतेच झाले. या वेळी ज्येष्ठ लेखक श्रीपाद टेंबे, डॉ. अनिल पाठक, संत साहित्याचे अभ्यासक डॉ. अरविंद नेरकर, सुनील कुलकर्णी आदी उपस्थित होते. उमेश देशमुख यांनी स्वागत केले. नेहा हवली यांनी सूत्रसंचालन केले. या वेळी गायिका चारुशीला बेलसरे यांनी गीतरामायणातील निवडक गीते सादर केली.
---

मुकुंद गोरे यांना जीवनगौरव पुरस्कार
पुणे ः वल्लरी मीडियातर्फे देण्यात येणारा पहिला ‘जीवनगौरव पुरस्कार’ चैतन्य ज्ञानपीठचे संस्थापक मुकुंद गोरे यांना जाहीर झाला. शनिवारी (ता. १४) सायंकाळी ५ वाजता टिळक रस्त्यावरील महाराष्ट्र साहित्य परिषदेच्या माधवराव पटवर्धन सभागृहात पुरस्कार वितरण होईल. या वेळी वल्लरी प्रकाशन संस्थेच्या ‘मधुमालती’ या प्रातिनिधिक काव्यसंग्रहाचे प्रकाशनही होईल.
-----