पुणे, ता. २५ ः ई-कॉमर्स कंपनीच्या ‘सीझन सेल’मुळे पुणे विमानतळावरील कार्गो सेवेला अच्छे दिन आले आहेत. पुण्यात विविध ई-कॉमर्स कंपन्यांची कार्यालये आहेत. सध्या दिवाळी व दसऱ्याच्या पार्श्वभूमीवर त्यांनी ग्राहकांना ऑफर्स दिल्या आहेत. त्यामुळे मोठ्या प्रमाणात ऑनलाइन खरेदी होत आहे. त्यामुळे विमानांद्वारे विविध शहरांत पार्सल पाठविली जातात. पुणे विमानतळावरून गेल्या तीन दिवसांत दिवसाला २० हजार किलोहून जास्त पार्सलची जावक वाढली आहे. पुण्याहून दिल्ली, बंगळूर व कोलकता या तीन शहरांसाठी सर्वांत जास्त पार्सल पाठविण्यात आल्याची माहिती पुणे विमानतळाच्या अधिकाऱ्याने दिली.
अशी आहे स्थिती
- पुणे विमानतळावरून अद्याप आंतरराष्ट्रीय कार्गो सेवा सुरू नाही
- देशांतर्गत कार्गो सेवेला चांगला प्रतिसाद
- दररोज सरासरी ६० हजार किलो वजनाच्या साहित्याची वाहतूक
- सद्यःस्थितीत दिवसाला ८० हजार किलो वजनाच्या साहित्याची वाहतूक
- ई-कॉमर्स कंपन्यांच्या सेलमुळे ‘कार्गो’ वाहतुकीत वाढ
- कार्गोची सेवा देणाऱ्या सहा विमान कंपन्यांना चांगला प्रतिसाद
आणखी वाढ होण्याची शक्यता
‘बीसीएएस’ची (ब्यूरो ऑफ सिव्हिल एव्हिएशन सिक्युरिटी) परवानगी मिळाल्यानंतर पुण्यातून सहा विमान कंपन्यांनी कार्गो सेवा सुरू केली. सप्टेंबरमध्ये ३६ लाख किलो वजनाच्या साहित्याची वाहतूक झाली. पूर्वी पुणे विमानतळावरून महिन्याला ३० लाख किलो वजनाच्या साहित्याची वाहतूक होत असे. आता त्यात वाढ झाली आहे. येत्या काही दिवसांत यात आणखी वाढ होण्याची शक्यता आहे.
एका विमानातून चार टन वाहतूक
प्रत्येक विमानाची क्षमता ही वेगळी असते. सामान्यपणे पुण्यातून उड्डाण घेणाऱ्या विमानांचा विचार केला तर एका विमानातून चार टन मालाची वाहतूक होते. ज्या विमानात प्रवाशांचे सामान जास्त आहे, त्या विमानात साडेतीन टन माल ठेवला जातो. लगेज जर कमी असेल तर मात्र चार टन मालाची वाहतूक सहज केली जाते.
----------
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.