पुणे, ता. ः महाराष्ट्र लोकसेवा आयोगामार्फत (एमपीएससी) घेण्यात येणारी संयुक्त पूर्व परीक्षा रविवारी (ता. ३०) होत आहे. एकूण आठ संवर्गांतील ८ हजार १६९ पदांच्या भरतीसाठी ‘एमपीएससी’कडून ही पूर्व परीक्षा घेण्यात येत असून, आजवरच्या इतिहासातील सर्वाधिक पदांसाठीची ही पहिलीच भरती प्रक्रिया आहे.
अराजपत्रित गट-ब आणि गट-क संवर्गातील पदांसाठीच्या या परीक्षेसाठी राज्यभरातील जवळपास चार लाख ६६ हजारांपेक्षा जास्त उमेदवारांनी अर्ज भरलेले आहेत. राज्यातील एकूण ३७ जिल्हा केंद्रांवर परीक्षा घेण्यात येईल. गट ‘ब’ सेवा मुख्य परीक्षा २ सप्टेंबरला आणि गट ‘क’ सेवा मुख्य परीक्षा ९ सप्टेंबरला घेण्यात येणार आहे. या भरती प्रक्रियेत सहायक कक्ष अधिकारी, राज्य कर निरीक्षक, दुय्यम निबंधक, दुय्यम निरीक्षक राज्य उत्पादन शुल्क, तांत्रिक सहायक, कर सहायक, लिपिक-टंकलेखक अशा एकूण ८ हजार १६९ पदांसाठी भरती प्रक्रिया राबवली जाणार असल्याचे ‘एमपीएससी’ने स्पष्ट केले आहे.

‘या’ विभागांसाठी भरती
- सामान्य प्रशासन विभाग ः सहायक कक्ष अधिकारी ः ७० पदे
- महाराष्ट्र लोकसेवा आयोग ः सहायक कक्ष अधिकारी ः ८ पदे

- वित्त विभाग
१) राज्य कर निरीक्षक ः १५९ पदे
२) तांत्रिक सहायक ः १ पद
३) कर सहायक ः ४६८ पदे

- गृह विभाग
१) पोलिस उपनिरीक्षक ः ३७४ पदे,
२) दुय्यम निरीक्षक, राज्य उत्पादन शुल्क ः ६ पदे
- महसूल व वन विभाग ः दुय्यम निबंधक (श्रेणी १) किंवा मुद्रांक निरीक्षक ः ४९ पदे
- मंत्रालयीन प्रशासकीय विभाग तसेच राज्य शासनाची महाराष्ट्रातील विविध कार्यालये ः लिपिक टंकलेखक ः ७०३४ पदे