पुणे, ता. १० ः औषधनिर्माणशास्त्रातील पदविकेच्या (डी. फार्मसी) प्रथम वर्षाचा निकाल यंदा चिंताजनक लागला आहे. प्रत्येक महाविद्यालयातील २५ ते ३० टक्के विद्यार्थी नापास झाले असून, पालकांसह महाविद्यालयांमध्येही नाराजीचे वातावरण आहे. वर्षभराचा अभ्यासक्रम केवळ ९० दिवसांत पूर्ण करण्याची वेळ आल्याने विद्यार्थ्यांचे मोठे नुकसान झाल्याचे तज्ज्ञांचे मत आहे. त्यामुळे या विद्यार्थ्यांची पुनर्परीक्षा घेण्याची मागणी करण्यात आली आहे.

२०२२-२३ शैक्षणिक वर्षाची प्रवेश प्रक्रिया लांबल्याने प्रथम वर्षाचे वेळापत्रक पूर्णताः कोलमडले आहे. त्याचाच फटका विद्यार्थ्यांना बसला आहे. एमसीई सोसायटीच्या इन्स्टिट्यूट ऑफ फार्मसीचे प्राचार्य डॉ. व्ही. एन. जगताप म्हणाले, ‘‘प्रवेश प्रक्रिया लांबल्यामुळे जानेवारी २०२३ मध्ये प्रथम वर्षाच्या शिकवणीला सुरुवात झाली. फार्मसीला वार्षिक परीक्षा असल्याने १८० दिवसांचा अभ्यासक्रम ९० दिवसांत संपवावा लागला. त्यामुळे विद्यार्थ्यांना अगदी सुटीच्या दिवशीही शिकवण्यात आले. कमी वेळेत तेवढ्याच अभ्यासक्रमावर परीक्षा देण्याची वेळ विद्यार्थ्यांवर आली. यामुळे अनुत्तीर्ण विद्यार्थ्यांचे प्रमाण चिंताजनक असून, विद्यार्थ्यांच्या हितासाठी त्यांची पुनर्परीक्षा घेण्याची मागणी आम्ही केली आहे. यासंदर्भात तंत्रशिक्षण मंडळासह फार्मसी कौन्सिल ऑफ इंडियालाही अर्ज केला आहे.’’

तज्ज्ञ म्हणतात..
- पदविका वर्षभर असताना केवळ ९० दिवसांत अभ्यासक्रम पूर्ण करण्याची वेळ
- एवढ्या कमी वेळेत विद्यार्थ्यांना अवाजवी अभ्यासक्रम
- अतिरिक्त तास आणि वेळेच्या अभावामुळे विद्यार्थ्यांचा अभ्यास नाही
- फार्मसी कौन्सिल ऑफ इंडियाच्या मानकांची पायमल्ली
- शैक्षणिक नुकसानाबरोबरच विद्यार्थ्यांच्या भविष्याशी तडजोड

मागणी...
विद्यार्थ्यांची तातडीने पुनर्परीक्षा घेत दिलासा द्यावा किंवा अनुत्तीर्ण विद्यार्थ्यांना कॅरी फॉरवर्ड नियम लावत पुढच्या वर्गात जाण्याची परवानगी मिळावी.