पुणे, ता. ३१ : लंडनमध्ये प्रथमच ‘साडी वॉकथॉन’ या उपक्रमाचे आयोजन करण्यात आले आहे. राष्ट्रीय हातमाग दिनानिमित्त ६ ऑगस्टला होणाऱ्या या उपक्रमात राज्यातील ५० आणि देशभरातील ५०० महिला सहभागी होणार आहेत.
‘ब्रिटिश वुमन इन सारी’ या संस्थेतर्फे डॉ. दीप्ती जैन यांच्या नेतृत्वाखाली या उपक्रमाचे आयोजन केले आहे. परदेशात वास्तव्यास असलेल्या लोकांमध्ये भारतीय हातमाग आणि हस्तनिर्मित दागिन्यांप्रती जागरूकता निर्माण करणे, हा या कार्यक्रमाचा मुख्य उद्देश आहे. देशातील विविध राज्यांमधील महिला पारंपरिक वेशभूषेत लंडन येथील ऐतिहासिक व प्रतिष्ठित स्थळांवरून यात मार्गक्रमण करणार आहेत. ही वॉकथॉन ट्रॅफल्गार स्क्वेअरपासून सुरू होऊन लंडनच्या वेस्टमिन्स्टरमधील ऐतिहासिक पार्लमेंट स्क्वेअर येथे समाप्त होईल.
मूळच्या पुण्याच्या असलेल्या अनुजा जाधव आणि मुंबईच्या रमा कर्मोकर या वॉकथॉनमध्ये राज्याचे प्रतिनिधित्व करणार आहेत. त्यांच्यासह सहभागी होणाऱ्या राज्यातील सुमारे ५० महिला आपल्या संस्कृतीचे महत्त्व पटवून देणारे पारंपरिक अलंकार, नऊवारी साडी आणि फेटा परिधान करून यात सहभागी होणार आहेत. ‘पार्लमेंट स्क्वेअर’मध्ये असलेल्या महात्मा गांधी यांच्या पुतळ्याला अभिवादन करून लावणी नृत्य सादर करणार आहेत.