हाडांचे आजार टाळण्यासाठी
जीवनशैली बदला : डॉ. दाते

पुणे, ता. २७ ः ‘‘बदलती जीवनशैली, चालण्याच्या, उठण्याच्या व बसण्याच्या चुकीच्या सवयींमुळे लोकांमध्ये हाडांशी संबंधित आजार मोठ्या प्रमाणात दिसून येतात. हाडांच्या मजबुतीसाठी सर्वांनी कोवळ्या उन्हात बसणे, कॅल्शिअमयुक्त पदार्थांचे सेवन आणि दैनंदिन जीवनशैलीमध्ये कालानुरूप संतुलन ठेवणे गरजेचे आहे,‘‘ असा सल्ला अस्थिरोगतज्ज्ञ डॉ. तुषार दाते यांनी दिला.
कोथरूड हॉस्पिटल आणि श्री संताजी प्रतिष्ठान यांच्यातर्फे विनामूल्य आरोग्य शिबिराचे आयोजन करण्यात आले. त्यावेळी औषधांचे मोफत वाटप करण्यात आले. शिबिरात १८० नागरिक सहभागी झाले. शिबिरात हाडांच्या आजारांचे निदान व उपचार करण्यात आले. हाडांच्या सर्व तपासण्यांसह संधीवात, अंगदुखी, मानदुखी, मणक्याचे आजार, कंबरदुखी, फ्रॅक्चर, हाडांचा ठिसूळपणा, खुब्याचे आजार, गुडघ्यांचे आजार, स्त्री रोग, कर्करोग, त्वचेचे आजार, पोटाचे विकार, छातीचे आजार व मधुमेहाची तपासणी, डी ३ जीवनसत्त्व व ईसीजी यासाठी चाचण्या करण्यात आल्या. रुग्णालयाचे संचालक डॉ. राजेंद्र मिटकर, डॉ. राजेंद्र गुंडावार, स्त्रीरोग तज्ञ डॉ. मंजूषा प्रभुणे यांच्याबरोबर, डॉ. निखिल ओझा, व डॉ. धीरज राणे आदींनी मार्गदर्शन केले.
-----