पुणे, ता. १७ : डोणजे (ता. हवेली) परिसरातील ठेकेदाराचे खंडणीसाठी अपहरण करून त्यांचा खून केल्याची धक्कादायक घटना घडली. या प्रकरणी पोलिसांनी तिघांना अटक केल्याची माहिती पुणे ग्रामीणचे पोलिस अधीक्षक पंकज देशमुख यांनी पत्रकार परिषदेत दिली. मुख्य आरोपी योगेश ऊर्फ बाबू किसन भामे (रा. डोणजे, ता. हवेली) हा अद्याप पसार असून, पोलिस त्याचा शोध घेत आहेत.

विठ्ठल सखाराम पोळेकर (वय ७०, रा. पोळेकरवाडी, डोणजे) असे खून झालेल्या ठेकेदाराचे नाव आहे. याबाबत पोळेकर यांच्या मुलीने हवेली पोलिस ठाण्यात फिर्याद दिली होती. त्यावरून योगेश ऊर्फ बाबू किसन भामे (रा. डोणजे, ता. हवेली) याच्याविरुद्ध गुन्हा दाखल करण्यात आला.

पोलिसांनी दिलेल्या माहितीनुसार, विठ्ठल पोळेकर यांचे १४ नोव्हेंबर रोजी सिंहगड किल्ल्याजवळून अपहरण करण्यात आले होते. आरोपी योगेश भामे याने खंडणी न दिल्यास पोळेकर यांना जीवे मारण्याची धमकी दिली होती. त्यामुळे पोलिसांना योगेश आणि त्याचा भाऊ रोहित किसन भामे यांनी पोळेकर यांचे अपहरण केल्याचा संशय होता.

गुन्हे शाखेचे पोलिस निरीक्षक अविनाश शिळीमकर आणि त्यांच्या पथकाने सीसीटीव्ही चित्रीकरण तपासले. त्यावेळी आरोपी मोटारीतून नाशिकच्या दिशेने गेल्याची माहिती मिळाली. पोलिसांनी नाशिकमध्ये आरोपींचा शोध घेतला. त्या वेळी आरोपी रेल्वेने मध्यप्रदेशमधील जबलपूरला गेल्याचे निष्पन्न झाले. पोलिसांनी जबलपूर पोलिसांच्या मदतीने तपास करून शुभम पोपट सोनवणे (वय २४, रा चिंचोली गुरव, ता. संगमनेर) आणि मिलिंद देविदास थोरात (वय २४, रा. बेलगाव, ता. कर्जत, जि. अहिल्यानगर) या दोघा आरोपींना अटक केली. चौकशीत त्यांनी मुख्य आरोपी योगेश भामे याच्या सांगण्यावरून संगनमताने हा गुन्हा केल्याचे सांगितले.

याप्रकरणी पोलिसांनी रोहित किसन भामे (वय २२, रा. डोणजे, ता. हवेली) यालाही अटक केली आहे. न्यायालयाने २१ नोव्हेंबरपर्यंत पोलिस कोठडी सुनावल्याचे पोलिस अधीक्षक देशमुख यांनी सांगितले.