पुणे : पुणेकरांनो, एप्रिलचे शेवटचे पाच दिवस कडक उन्हाचे ठरणार आहेत. पाचपैकी तीन दिवस कमाल तापमानाचा पारा ४० अंश सेल्सिअसपर्यंत उसळी मारेल, असा अंदाज हवामान खात्याने वर्तविला आहे. दरम्यान, बुधवारच्या (३८.५) तुलनेत गुरुवारी संध्याकाळी साडेपाच वाजेपर्यंत शिवाजीनगर येथे कमाल तापमान ३९.४ अंश सेल्सिअस नोंदले गेले.

पुणे शहरात येत्या शुक्रवारी (ता. २६) आकाश मुख्यतः निरभ्र राहण्याची शक्यता असून दुपारनंतर अंशतः ढगाळ होईल. त्यामुळे मेघगर्जनेसह विजांचा कडकडाट होईल, असा अंदाज आहे. या दरम्यान कमाल तापमान ३९ अंश सेल्सिअसच्या दरम्यान नोंदले जाईल. शनिवारी (ता. २७) आकाश निरभ्र राहण्याची शक्यता असल्याने कमाल तापमानाचा पारा पुन्हा चाळीशीपर्यंत उसळी मारेल, असा अंदाज आहे. रविवारी (ता. २८) दुपारनंतर पुन्हा ढगाळ वातावरणाचा अंदाज असल्याने अंशतः पारा कमी होईल. नंतर एप्रिलच्या शेवटच्या दोन दिवसांमध्ये (ता. २९ आणि ३०) कमाल तापमान चाळीशीपर्यंत वाढेल, असे खात्यातर्फे सांगण्यात आले.

रात्री उकाडा वाढला
दिवसभर उन्हाच्या चटक्यात होरपळणाऱ्या पुण्यात रात्रीचा उकाडाही सातत्याने वाढत आहे. त्यामुळे पंखा, कुलर आणि ‘एसी’शिवाय झोपणे शक्य होत नाही. अशा वेळी पुढील पाच दिवस किमान तापमान २१ ते २२ अंश सेल्सिअसच्या दरम्यान नोंदले जाईल, असा अंदाज वर्तविण्यात आला आहे.

असा वाढला रात्रीचा उकाडा
तारीख .............. किमान तापमान (आकडे अंश सेल्सिअसमध्ये)
२१ एप्रिल ............. २०.९
२२ ........................ २१.४
२३ ........................ २१.७
२४ ........................ २२.२
२५ ........................ २२.९

• 
  कमाल तापमान (आकडे अंश सेल्सिअसमध्ये)
  वडगाव शेरी ............. ४१.३
  कोरेगाव पार्क ............ ४१
  हडपसर ..................... ४०.७
  मगरपट्टा ................. ४०
  पाषाण ................... ३९.२
  एनडीए ................... ३८.३