‘टेल मी अ स्टोरी’ प्रदर्शन शनिवारपासून
पुणे, ता. १५ ः स्मिता राजे-देशपांडे आणि मनिषा वेदपाठक यांच्या ‘कलागोष्टी’ या संस्थेतर्फे शनिवारपासून (ता. १९) ‘टेल मी अ स्टोरी’ या कला प्रदर्शनाचे आयोजन करण्यात आले आहे. या प्रदर्शनात ४० हून अधिक कलाकार सहभागी होणार असून, चित्र, शिल्प, नृत्य, कविता, दृकश्राव्य कला आदी विविध कलाकृती या प्रदर्शनात पाहायला मिळणार आहेत. हे प्रदर्शन सोमवारपर्यंत (ता. २१) सकाळी ११ ते सायंकाळी ८ या वेळेत भूगाव येथील पूना वेस्टर्न क्लब येथे सर्वांसाठी खुले असेल.
----
‘ऊर्जा’ युवा संगीत सभा रविवारी
पुणे, ता. १५ ः नव्या पिढीतील कलाकारांना हक्काचे व्यासपीठ उपलब्ध व्हावे, या उद्देशाने मएसो कलावर्धिनी आणि स्वराधार फाउंडेशन यांच्यातर्फे येत्या रविवारी (ता. २०) ‘ऊर्जा’ युवा संगीत सभेचे आयोजन करण्यात आले आहे. हा कार्यक्रम सकाळी १० वाजता सदाशिव पेठेतील रेणुका स्वरूप शाळेच्या आवारातील भावे प्राथमिक शाळेच्या सभागृहात होणार असल्याची माहिती स्वराधार फाउंडेशनचे संचालक नील दीक्षित यांनी दिली. या वेळी अनिरुद्ध देशपांडे यांचे एकल तबलावादन, कल्याणी देशपांडे यांचे सतारवादन आणि केदार केळकर यांचे गायन होणार आहे. हा कार्यक्रम सर्वांसाठी खुला आहे.
----
‘प्रकृती’ प्रदर्शन २३ ऑक्टोबरपासून
पुणे, ता. १५ ः चित्रकार कल्याणी भोगले आणि क्रोशे कलाकार रचना बजाज यांच्या ‘प्रकृती - दी इसेन्स ऑफ नेचर’ या प्रदर्शनाचे आयोजन करण्यात आले आहे. २३ ते २७ ऑक्टोबर या कालावधीत सकाळी ११ ते सायंकाळी ७ वाजेपर्यंत घोले रस्त्यावरील राजा रविवर्मा कलादालन येथे हे प्रदर्शन सर्वांसाठी खुले असेल. चित्रांसह क्रोशे कला
यांच्या माध्यमातून निसर्गाचे अनेकविध आविष्कार अनुभवण्याची संधी रसिकांना मिळणार आहे.