पुणे, ता. २७ : राजमुद्रेचा फोटो व्हॉट्स अॅप डीपीला ठेवून त्यावर आयएएस ऑफिसर असल्याचे भासवून सावकारी करणाऱ्या महिलेला लोणी काळभोर पोलिसांनी अटक केली आहे. दुप्पट पैसे दिल्यानंतरही अधिक पैशांची मागणी करत जीवे मारण्याची धमकी तिने एका महिलेला दिली होती.

रेणुका ईश्वर करनुरे (वय ३२, रा. सिद्धिविनायक सोसायटी, वडकी) असे अटक करण्यात आलेल्या महिलेचे नाव आहे. याप्रकरणी पूजा प्रवीण मोरे (३१, रा. हवेली) यांनी लोणी काळभोर पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, फिर्यादी या घरगुती व्यवसाय करतात. रेणुकाने आपण आयएएस असल्याचे मोरे यांना सांगितले. फिर्यादी यांना पैशांची गरज असल्याने त्यांनी रेणुका हिच्याकडून सुरुवातीला दरमहा पाच टक्के दराने ६० हजार रुपये घेतले होते. त्यानंतर टप्प्याटप्प्याने दोन लाख ६८ हजार रुपये घेतले होते. त्याबदल्यात तीन लाख ४८ हजार ६५० रुपयांचे व्याज फिर्यादी यांनी आरोपीला दिले. दोन लाख ६८ हजार रुपयांपोटी त्यांनी आठ लाख आठ हजार ६५० रुपये दिलेले आहेत. असे असतानाही आणखी चार लाख ५५ हजार ५९८ रुपये देणे बाकी असल्याचे ती म्हणत होती. वेळोवेळी पैशांची मागणी करून पैसे न दिल्यास ठार मारण्याची धमकी ती देत होती. पोलिस उपनिरीक्षक अमोल घोडके अधिक तपास करत आहेत.

महिन्याला सहा हजार रुपये दंड
व्याजाचे पैसे वेळेवर दिले नाही तर रेणुका ही केवळ दंडाचे सहा हजार रुपये वसुल करत होती. पैसे न दिल्याने तिने फिर्यादीच्या पतीची कार जबरदस्तीने ओढून नेली होती. अडीच लाख रुपये दिल्यानंतर तिने ती परत केली होती.