पुणे, ता. ११ : मतदानाच्या दिवशी १२ तासांच्या कामासाठी अत्यल्प मानधन दिले जाईल, असे आशा वर्करला तोंडी सांगण्यात आले आहे. तसेच वेगळा प्रवास भत्ता किंवा जेवणाची व्यवस्था केली जात नसल्याचा त्यांचा अनुभव आहे. त्यामुळे निवडणूक कामातून सूट मिळावी, अशी मागणी आशा वर्कर यांनी केली आहे.
१२ तासांच्या ड्यूटीसाठी केवळ २०० रुपयांचे मानधन दिले जाईल, असे आशा वर्करला तोंडी सांगण्यात आले आहे. त्यांच्यासाठी वेगळा प्रवास भत्ता किंवा जेवणाची व्यवस्था केलेली नाही. आशा वर्कर यांना सध्या कोणतीच वेतनश्रेणी लागू नाही. अनेक आशा वर्करची त्यांच्या घरापासून लांबच्या मतदान केंद्रांवर नियुक्ती केली आहे. त्यामुळे प्रवास खर्चासाठी पदरमोड करावी लागेल. तसेच त्यांना कामावर आधारित मोबदला मिळत असल्याने, त्यादिवशी त्यांना काम करता येणार नाही आणि त्यांचा मोबदला देखील मिळणार नाही, अशी माहिती ‘आशा वर्कर्स युनियन’च्या सचिव किरण मोघे यांनी दिली.

आशा वर्कर्स युनियनच्या मागण्या
- किमान ७०० रुपये मानधन किंवा चतुर्थ श्रेणी सरकारी कर्मचाऱ्यांना लागू असलेले वेतन मिळावे
- प्रवास व दैनिक भत्ता मिळावा
- अपंग, वृद्ध आणि आजारपण अशी वैयक्तिक कारणे असलेल्यांना कामातून सूट मिळावी
- आपला मतदानाचा अधिकार बजावण्यासाठी मतदानाची व्यवस्था करावी