पुणे : पुणे महापालिकेतील कनिष्ठ अभियंत्याच्या टेबलाच्या ड्रॉवरमध्ये ५०० रुपयांचे बंडल सापडण्याच्या घटनेस एक महिना होऊनही या प्रकरणातील दोषी अधिकाऱ्यावर अद्याप ठोस कारवाई करण्यात आलेली नाही. महापालिकेकडून चौकशी अहवालाचे कागदी घोडे नाचवून दोषी अधिकाऱ्याला पाठीशी घातले जात आहे. तत्कालीन आयुक्तांनी या प्रकरणाकडे दुर्लक्ष केले, तर नव्याने आलेल्या आयुक्तांकडूनही या गंभीर प्रकरणाची दखल घेतली नसल्याची सद्यःस्थिती आहे.
महापालिकेच्या पथ विभागात कनिष्ठ अभियंत्याच्या ड्रॉवरमध्ये लाखो रुपयांच्या नोटा सापडल्या आहेत. आम आदमी पक्षाचे कार्यकर्ते रविराज काळे यांनी हा प्रकार उघडकीस आणला होता. हा प्रकार ५ मार्च रोजी घडला होता. या घटनेचा व्हिडिओ समाजमाध्यमात मोठ्या प्रमाणात प्रसारित झाला आहे. दरम्यान, तत्कालीन आयुक्त विक्रम कुमार यांनी या घटनेची चौकशी करून त्याबाबतचा अहवाल मागविला होता. त्यानुसार, पथ विभागाचे प्रमुख अनिरुद्ध पावसकर यांनी विक्रम कुमार यांच्याकडे प्राथमिक अहवाल सादर केला आहे, मात्र तत्कालीन आयुक्तांनी संबंधित अहवाल उघडला नाही, त्याचवेळी प्रशासनाने संबंधित कनिष्ठ अभियंत्याला प्रशासनाने सक्तीच्या रजेवर पाठविले.
दरम्यान, विक्रम कुमार यांनी संबंधित अहवालाची दखल घेत कारवाई केली नाही. कुमार यांच्या बदलीनंतर नव्याने आलेल्या महापालिका आयुक्त डॉ. राजेंद्र भोसले यांच्याकडे संबंधित प्रकरणाचा अहवाल जाऊन त्यावर कारवाई होणे अपेक्षित होते. प्रत्यक्षात अजूनही आयुक्तांकडून या प्रकरणात कुठलीही कारवाई झालेली नाही.
दुसऱ्या समितीची फक्त घोषणाच !
या प्रकरणाच्या सविस्तर चौकशीसाठी पथ विभागाचे अधीक्षक अभियंता साहेबराव दांडगे आणि मलःनिसारण विभागाचे (प्रकल्प) अधिक्षक अभियंता जगदीश खानोरे यांची दोन सदस्यीय समिती नेमल्याचे आणि ही समिती सात दिवसांत अहवाल देणार असल्याचे प्रशासनातर्फे सांगण्यात आले होते. प्रत्यक्षात अशी समितीच नेमण्यात आली नसल्याने प्रशासनाकडून या प्रकरणात धूळफेक करण्याचा प्रकार सुरू असल्याचे दिसत आहे.
संबंधित प्रकरणाचा अहवाल महापालिका आयुक्तांकडे सादर करण्यात आलेला आहे. आयुक्तांकडूनच या प्रकरणी पुढील कार्यवाही केली जाईल. -अनिरुद्ध पावसकर, प्रमुख, पथ विभाग, पुणे महापालिका
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.