पुणे : देशात वैद्यकीय अभ्यासक्रमासाठी पाच मे रोजी ‘नीट-यूजी’ परीक्षा घेण्यात येत आहे. या परीक्षेसाठी महाराष्ट्रातील जवळपास दोन लाखांहून अधिक विद्यार्थ्यांनी नोंदणी केलेली आहे. त्यामुळे ‘नीट-यूजी’ आणि ‘एमएचटी-सीईटी २०२४’ (पीसीएम) देणाऱ्या विद्यार्थ्यांना ‘सीईटी’ (पीसीएम) परीक्षेची तारीख बदलून घेण्याची संधी मिळणार आहे, असे महाराष्ट्र राज्य सामाईक प्रवेश परीक्षा कक्षाने स्पष्ट केले आहे.

वैद्यकीय अभ्यासक्रमासाठी होणाऱ्या ‘नीट-यूजी २०२४’ परीक्षेसाठी देशातील जवळपास १५ लाखांहून अधिक विद्यार्थ्यांनी नोंदणी केली आहे. विद्यार्थी ‘नीट’सह राज्यात होणारी ‘सीईटी’ परीक्षाही देतात. या दोन्ही परीक्षा देणाऱ्या विद्यार्थ्यांची संख्या लक्षणीय आहे.

म्हणून राज्य सामाईक प्रवेश परीक्षा कक्षाने पाच मे रोजी होणाऱ्या ‘सीईटी’च्या तारखांमध्ये बदल केला आहे. नव्या बदलानुसार सीईटी सेलने सुधारित वेळापत्रकही यापूर्वीच जाहीर केले आहे. ‘सीईटी’ (पीसीएम) पाच मे रोजी होणार नाही; तरीही ज्यांना प्रवेशपत्र प्राप्त झाल्यानंतर ‘सीईटी’ (पीसीएम) परीक्षेची तारीख वैयक्तिक कारणासाठी बदलणे आवश्यक वाटते, अशा विद्यार्थ्यांना तारीख बदलण्याची संधी मिळण्याची शक्यता आहे. त्यांनी ‘नीट-यूजी २०२४’ परीक्षेच्या प्रवेश पत्रासह mhtcetpcm2024@gmail.com या ई-मेलवर आपला विनंती अर्ज करावा, असे आवाहन राज्य सामाईक प्रवेश परीक्षा कक्षाने केले आहे.