पुणे : जिल्हा परिषदेने जिल्ह्यात येत्या गुरुवारी (ता.१६) स्वच्छता महाश्रमदान दिन आयोजित केला आहे. या दिवशी सकाळी सात ते दुपारी बारा वाजेपर्यंत गावा-गावातील परिसर स्वच्छ केला जाणार आहे.

या दिवशी सर्व गावांमध्ये एकाचवेळी सामुदायिक श्रमदान, शोषखड्डा निर्मिती, भिंतींवर स्वच्छताविषयक घोषवाक्य लिहिणे, सार्वजनिक ठिकाणी भिंतीवर स्वच्छतेचे संदेश लिहिणे, शाळा-अंगणवाड्यांमध्ये पिण्याच्या पाण्याची सुविधा करणे, सार्वजनिक शौचालयांचे रंगकाम करणे, घनकचरा व्यवस्थापन प्रकल्प कार्यान्वित करणे आणि प्लॅस्टिक बंदी विषयक कार्यवाही करणे आदी स्वच्छताविषयक कामे केली जाणार आहेत.

सामुदायिक श्रमदानात गावातील सर्वच ठिकाणांची साफसफाई करणे, झाडलोट करणे, कचरा संकलन व वर्गीकरण करणे, कचरा उचित व्यवस्थापन करणे, पाण्याच्या स्त्रोतांची स्वच्छता केली जाणार आहे. या महाश्रमदान दिनात रकारी यंत्रणेतील सर्व जिल्हा, तालुका व गावपातळीवरील अधिकारी, कर्मचारी, स्थानिक लोकप्रतिनिधी, ग्रामस्थ, तरुण, महिला मंडळे, बचतगट व गणेश मंडळे आदींचा सहभाग असणार आहे.

दरम्यान, या उपक्रमाच्या पूर्वतयारीचा एक भाग म्हणून मुख्य कार्यकारी अधिकारी आयुष प्रसाद यांनी आज (ता. १३) सर्व सरपंच, ग्रामसेवक यांची आॅनलाइन बैठक घेतली. या उपक्रमाची माहिती आपापल्या गावातील सर्व ग्रामस्थांना माहितीपत्रक, दवंडी आणि लाऊडस्पीकरवरून देण्याच्या सूचना प्रसाद यांनी यावेळी सर्व ग्रामसेवकांना दिल्या.