नारायणगाव : पिंपळगाव तर्फे नारायणगाव येथील जागृत शेतकऱ्यामुळे सोयाबीन व कांदा या पिकांच्या बनावट बियाणाची विक्री करून शेतकऱ्यांची फसवणूक करणाऱ्या दोन जणांना अटक करण्यात नारायणगाव पोलिसांना यश आले आहे.आरोपीकडून सोयाबीन व कांदा बियांणाच्या २६ पिशव्या व जीप जप्त करण्यात आली आहे. अशी माहिती सहायक पोलीस निरीक्षक पृथ्वीराज ताटे यांनी दिली. या प्रकरणी रामेश्वर मनोहर देशमुख (राहणार तळणी,तालुका मंठा , जि. जालना), लोकेश शंकर डुंबरे ( राहणार राजुरी, तालुका जुन्नर , जि.पुणे) यांना अटक करण्यात आली आहे.

दत्तात्रय तुकाराम वऱ्हाडी( राहणार पिंपळगाव तर्फे नारायणगाव, ता. जुन्नर) यांनी ६ जुलै २०२२ रोजी आरोपी कडून वीस किलोग्रॅम वजनाची सोयाबीन बियाणाची पिशवी खरेदी केली. पेरणी करण्यापूर्वी वऱ्हाडी यांनी बियाणाच्या पिशवीवरील मजकुराचे वाचन केले असता बियाणाच्या पिशवीवर बियाणांची उगवनक्षमता,शुद्धता, परीक्षण दिनांक , टॅगनंबर , शिफारस हंगाम व बियाणे सत्यता दर्शक लेबल आदी माहीती आढळुन आली नाही.संशय आल्याने वऱ्हाडी यांनी या बाबतची माहिती आमदार अतुल बेनके, पंचायत समिती जुन्नरचे कृषी अधिकारी तथा बियाणे निरीक्षक नीलेश प्रकाश बुधवंत यांना दिली.त्या नंतर तालुका कृषी अधिकारी सतिश शिरसाठ, बियाणे निरीक्षक बुधवंत व वऱ्हाडी यांनी येथील निलायम हॉटेल जवळ बियाणे विक्रीसाठी आलेले रामेश्वर देशमुख , लोकेश डुंबरे यांना ताब्यात घेतले. त्यांच्याजवळ असलेल्या गाडीत सोयाबीन बियांणाच्या प्रत्येकी वीस किलोग्रॅम वजनाच्या पाच पिशव्या, कांदा बियांणाच्या २० पिशव्या आढळून आल्या. आरोपीकडे बियाणे विक्रीचा परवाना, उगम प्रमाणपत्र आदी कागदपत्रे आढळून आली नाही.

या मुळे बियाणे निरीक्षक बुधवंत यांनी या बाबतची तक्रार नारायणगाव पोलीस ठाण्यात दाखल केली. पोलिसांनी बनावट बियाणाची विक्री प्रकरणी रामेश्वर देशमुख , लोकेश डुंबरे यांना अटक करून त्यांच्या ताब्यातील सोयाबीन व कांदा पिकांचे बनावट बियाणे व जीप असा मुद्देमाल जप्त केला.

अतुल बेनके (आमदार , जुन्नर): ज्या शेतकऱ्यांनी रामेश्वर देशमुख , लोकेश डुंबरे यांच्याकडून सोयाबीन व कांदा बियांणाची खरेदी केली आहे. आशा शेतकऱ्यांनी या बाबतची तक्रार नारायणगाव पोलीस ठाण्यात करावी. बियाणे खरेदी करताना विक्रेत्याकडून पक्की पावती घ्यावी.कृषी विभागाने सतर्क राहून बनावट बियाणे विक्री करणाऱ्यांचा शोध घ्यावा. या कामात हलगर्जी करणाऱ्या संबंधित कृषी अधिकारी यांच्यावर कारवाई करण्यात येईल.