पुणे - शहरात दोन वेगवेगळ्या अपघातांत दोघांचा मृत्यू झाला. तर धानोरी परिसरात रविवारी मध्यरात्री भरधाव मोटारीने रस्त्याच्या कडेला थांबलेल्या रिक्षाला धडक दिली. यात चौघे जखमी झाले आहेत.

धानोरीतील पोरवाल रस्त्यावर रविवारी रात्री साडेबाराच्या सुमारास रिक्षाचालक नातेवाइकांसह आइस्क्रीम खाण्यासाठी आला होता. त्याने रिक्षा रस्त्याच्या कडेला लावली होती. रिक्षाचालक, दोन महिला, लहान मुलगा रिक्षात होते. त्यावेळी भरधाव मोटारीने पाठीमागून रिक्षाला धडक दिली. यात चौघे जखमी झाले तर रिक्षाचालक गंभीर जखमी झाला असून, त्याला रुग्णालयात दाखल करण्यात आले.

या प्रकरणात नागरिकांनी चालक असलेल्या १९ वर्षीय तरुणाला पकडून पोलिसांच्या ताब्यात दिले. त्याने मद्यप्राशन केल्याचा जबाब रिक्षाचालकाने दिला. मोटारचालक तरुण नुकताच बारावी उत्तीर्ण झाला आहे. अपघातात अमृता अशोक पायाळ (वय १२), सायमन साळवे (वय ५०), ज्योती पायाळ (वय ३५), सानिका साळवी हे चौघे जखमी झाले. याप्रकरणी अशोक पायाळ यांनी फिर्याद दिली. त्यावरून विमानतळ पोलिसांनी मोटारचालक आर्यन चतुर्वेदी (वय १९, रा. धानोरी) याच्याविरुद्ध गुन्हा दाखल केला.

नगर रस्त्यावरील आव्हाळवाडी परिसरात रस्ता ओलांडणाऱ्या शाळकरी मुलाचा वाहनाच्या धडकेत मृत्यू झाला. मानस अभिजित पवार (वय १२, रा. वृंदावन सोसायटी, आव्हाळवाडी, नगर रस्ता) असे मृत्युमुखी पडलेल्या मुलाचे नाव आहे. याबाबत त्याचे वडील प्रवीण पवार (वय ३९) यांनी लोणीकंद पोलिस ठाण्यात फिर्याद दिली.

रविवारी दुपारी मानस नगर रस्त्यावरील आव्हाळवाडी परिसरातून निघाला होता. त्यावेळी रस्ता ओलांडणाऱ्या मानसला दुचाकीने धडक दिली. मानस रस्त्यात पडला व मागून आलेल्या मोटारीच्या चाकाखाली सापडून त्याचा मृत्यू झाला. या गुन्ह्याचा तपास पोलिस उपनिरीक्षक वैजनाथ केदार करत आहेत.

भरधाव पीएमपीच्या धडकेत दुचाकीस्वार ज्येष्ठ नागरिकाचा मृत्यू झाल्याची घटना वारजे भागात घडली. वसंत लक्ष्मण तिकोने (वय ६२, रा. केळेवाडी, पौडफाटा) असे मृत्युमुखी पडलेल्या ज्येष्ठ नागरिकाचे नाव आहे. याबाबत कैलास तिकोने (वय ५५, रा. मुठा, ता. मुळशी) यांनी वारजे माळवाडी पोलिस ठाण्यात फिर्याद दिली.