वेल्हे, (पुणे) - केंद्रीय गृह मंत्रालयाकडून तपासासाठी दिला जाणारा २०२२ मधील उत्कृष्ट कामगिरीसाठीचे पदक वेल्हे पोलीस स्टेशनचे प्रभारी अधिकारी सहाय्यक पोलीस निरीक्षक मनोज पवार यांना जाहीर झाला असल्याने तालुक्यामधून त्यांच्यावर अभिनंदनचा वर्षाव होत आहे.

पानशेत येथील अडीच वर्षीय अत्याचारीत आदिवासी बालिकेच्या निघृण खुनाच्या गुन्ह्यांचा उत्कृष्टरित्या तपास केल्याबद्दल वेल्हे पोलिस ठाण्याचे सहायक पोलिस निरीक्षक मनोज पवार यांना केंद्रीय गृहमंत्री पदक जाहीर झाले आहे.

केंद्र सरकारच्या गृह विभागाकडून दरवर्षी गुन्ह्यांचा उत्कृष्ट तपास करणाऱ्या तपासी अधिकाऱ्यांना 'केंद्रीय गृहमंत्री पदक' दरवर्षी दिले जातात. यावर्षी महाराष्ट्रातून ११ पोलीस अधिकाऱ्यांची निवड करण्यात आली असून त्यापैकी वेल्हे पोलिस ठाण्याचे सहाय्यक पोलिस निरीक्षक मनोज मोहन पवार यांची निवड नक्कीच वेल्हे तालुका तसेच पुणे जिल्ह्यासाठी अभिमानास्पद त्याचे मत व्यक्त करत भोर विधानसभा मतदारसंघाचे आमदार संग्राम थोपटे यांनी त्यांचे अभिनंदन केले आहे.

पानशेत येथील आदिवासी अडीच वर्षीय चिमुकली हरविल्याची तक्रार १५ फेब्रुवारी २०२१ दाखल झाली होती. मुलीचा शोध घेत असताना मुलीचा मृतदेह सापडला होता दरम्यान शवविच्छेदन अहवालात डॉक्टरांनी तिच्यावर लैंगिक अत्याचार होऊन ती मयत झाल्याचा अभिप्राय दिला. सीसीटीव्ही फुटेज आणि साक्षीदार यांच्याकडून मिळालेल्या माहितीवरून आरोपीला रायगड जिल्ह्यातील दुर्गम भागात पायपीट करून ४८ तासांत जेरबंद केले.

घटनेचे गांभीर्य लक्षात घेऊन पुणे ग्रामीणचे अधीक्षक डॉ. अभिनव देशमुख यांनी सदरची केस अति संवेदनशील असून याचा खटला जलद गती न्यायालय चालवण्याची विनंती केली होती.

या गुन्ह्यात आरोपीला २८ फेब्रुवारी २०२२ रोजी फाशीची शिक्षा सुनावण्यात आली आहे. तर आंबवणे येथील पुणे जिल्हा मध्यवर्ती सहकारी सहकारी बँकेमध्ये चोरीची घटना घडली असता यामधील आरोपीला सुद्धा अवघ्या सहा तासात अटक केली होती.

वेल्हे पोलीस स्टेशनच्या इतिहासामध्ये तालुक्यामध्ये पहिल्यांदाच एखाद्या आरोपीला फाशीची शिक्षा सुनावली गेली असून केंद्रीय गृहमंत्री पदक पहिल्यांदाच वेल्ह्यातील पोलीस स्टेशनचे अधिकारी मनोज मोहन पवार यांच्या रूपाने मिळाले असून तालुक्यातील विविध स्तरांवरून त्यांच्यावर कौतुकाचा वर्षाव होत आहे.