आंबेठाण : खेड तालुक्यात कोरोनाचा वाढता प्रादुर्भाव लक्षात घेता वासुली फाटा (ता. खेड) येथे भरणारा आठवडे बाजार रविवारी बंद ठेवण्याचा निर्णय भांबोली ग्रामपंचायतीने घेतला आहे. दर रविवारी येथे आठवडे बाजार भरत असतो. अत्यावश्यक सेवा वगळता इतर सर्व दुकाने रविवारी बंद राहतील अशी माहिती ग्रामपंचायतीच्या माध्यमातून काढण्यात आलेल्या पत्रकात दिली आहे.
वासुली फाटा ही चाकण औद्योगिक वसाहतीमधील महत्वपूर्ण आणि मोठी बाजारपेठ आहे. आठवडे बाजाराच्या दिवशी येथे हजारो लोकांची रेलचेल असते. यात कारखान्यात काम करणारा मोठा वर्ग आहे. सर्वत्र कोरोनाचा वाढता प्रादुर्भाव लक्षात घेता या भागात मोठी गर्दी होत होती याकडे दैनिक 'सकाळ'ने वृत्त देऊन लक्ष वेधले होते. बाजाराच्या दिवशी निम्म्यापेक्षा अधिक लोक विनामास्क फिरताना दिसत होते. यातून सामूहिक संसर्गाचा धोका आहे हे निदर्शनास आणून दिले होते.
या बाजारपेठेत होणारी प्रचंड गर्दी ही कोरोनाला निमंत्रण देणारी ठरेल अशी शक्यता मांडली होती. याची दखल घेत स्थानिक ग्रामपंचायतीने २८ तारखेला होणारा भाजीपाल्याचा आठवडे बाजार बंद राहणार असल्याचे जाहीर केले आहे. याशिवाय हॉटेल आणि अन्य दुकाने देखील बंद राहणार असल्याचे सांगितले आहे. या दिवशी फक्त दवाखाना आणि मेडिकल अशी अत्यावश्यक सेवा देणारी आस्थापणे सुरू राहतील असे सांगितले आहे.
कोरोना आजाराला नियंत्रित ठेवण्यासाठी ग्रामपंचायतीने घेतलेल्या या निर्णयाला दुकानदारांनी पाठिंबा द्यावा असे आवाहन ग्रामपंचायतीने केले आहे. तसेच आदेशाचा भंग केल्यास कारवाई करण्याचा इशारा सरपंच भरत लांडगे आणि ग्रामसेवक काकासाहेब मिंड यांनी दिला आहे.
(संपादन : सागर डी. शेलार)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.