पुणे : राज्यात मुंबई आणि पुणे शहरामध्ये ‘फोक्सवॅगन इंडिया’च्या सर्व वाहनांना ग्राहकांची मोठी मागणी आहे. आता राज्यात विस्तार करण्यासाठी कंपनी प्रयत्नशील आहे. मेट्रो शहरांसह राज्यातील इतर शहरी व निमशहरी भागातही ‘फोक्सवॅगन इंडिया’च्या वाहनांना मागणी वाढत असून ती पूर्ण करण्यासाठी पावले उचलत असल्याचे कंपनीने म्हटले आहे.

‘फोक्सवॅगन इंडिया’चे मुख्यालय आणि उत्पादन कारखाने राज्यात आहेत. ‘फोक्सवॅगन इंडिया’च्या एकूण वाहन विक्रीमध्ये राज्याचे योगदान १५ टक्के आहे. त्यामुळे छोट्या शहरांमध्ये वितरण साखळीचा विस्तार करण्यासाठी धोरणात्मक गुंतवणूक केली आहे. त्यामुळे अधिकाधिक ग्राहकांना ‘फोक्सवॅगन’ची वाहने विकत घेणे सहज शक्य होत आहे, असेही कंपनीने स्पष्ट केले.

गाड्यांची देखरेख, दुरुस्ती तसेच इतर सर्व सेवा आणि सुविधा सहज उपलब्ध व्हाव्यात, यासाठी कंपनीने या शहरांमध्ये मोठ्या प्रमाणात डीलरशिप व सर्व्हिस सेंटर उभारली आहेत. वाहनांच्या विक्री-पश्चात ग्राहकांना सेवा पुरवण्याला कंपनीने प्राधान्य दिले आहे. तसेच, वापरण्यासाठी अतिशय सोपे संकेतस्थळ आणि समाजमाध्यमांवरून सातत्याने साधलेला संवाद, यातून ग्राहकांना आपल्याशी जोडून ठेवण्यात यश मिळवले असल्याचे कंपनीने नमूद केले आहे.