वालचंदनगर : वालचंदनगर (ता.इंदापूर) येथील वालचंदनगर कंपनी भारताच्या महत्वकांक्षी गगनयान मोहिमेची महत्वाची उपकरणे तयार करीत असून आजच्या चाचणीमध्ये ही वालचंदनगर कंपनीने तयार केलेली क्रू एस्केप सिस्टीम जेटीसनिंग मोटर वापरण्यात आली . गगनयानाची चाचणी यशस्वी झाली असल्याची माहिती वालचंदनगर कंपनीचे व्यवस्थापकीय संचालक व मुख्य कार्यकारी अधिकारी चिराग दोशी व व्हाईस प्रेसिडेंट धीरज केसकर यांनी दिली.

भारतीय अवकाश संशोधन संस्था गगनयान मोहिमेची तयारी करीत आहेत. यासंदर्भातील ‘ उड्डाण रद्दची ’ एक चाचणी आज शनिवार (ता.२१) रोजी घेण्यात आली. या चाचणीमध्ये यानाच्या उड्डानानंतर आपत्कालीन परिस्थितीत यानातील अंतरिक्ष क्रू एस्केप सिस्टीम द्वारे सुरक्षित बाहेर पडू शकतात. आजच्या चाचणीमध्ये वालचंदनगर कंपनीने तयार केलेल्या क्रू एस्केप सिस्टीम जेटीसनिंग मोटर (सीजेएम) विकसित करुन तयार केली आहे.

गगनयान माेहिमेसाठी वालचंदनगर कंपनीने एचएस २०० सॉलिड रॉकेट बूस्टर सह इतर महत्वाची उपकरणे विकसित करुन त्याचे टेस्टिंग करत आहेत. गगनयानाच्या पहिल्या चाचणीच्या यशाबद्दल वालचंदनगर कंपनीचे व्यवस्थापकीय संचालक व मुख्य कार्यकारी अधिकारी चिराग दोशी,व्हाईस प्रेसिडेंट धीरज केसकर यांनी सर्व कामगारांचे,इंजिनिअरचे कौतुक केले.

तसेच कंपनीमध्ये पेढे वाटून आनंदउत्सव साजरा करण्यात आला.भारतीय अवकाश संशोधन संस्थेशी वालचंदनगर कंपनी गेल्या पाच दशाकापासून यशस्वीपणे काम करीत आहेत. चांद्रयान - १, चांद्रयान-२,चांद्रयान - ३, मंगळयान तसेच आदित्य एल- १ माेहिमेमध्ये वालचंदनगर कंपनीचा मोलाचा सहभाग होता.या मोहिमेसाठी कंपनी हेवी बुस्टर्स मोटर्स सह इतर महत्वाची उपकरणे तयार केली होती. याव्यतिरिक्त कंपनी देशउभारणीसाठी महत्वाच्या असणाऱ्या अणुउर्जा,डिफेन्स,एरोस्पेस,मिसाईल च्या क्षेत्रामध्ये कार्यरत आहे.