कोंढवा : कोंढवा-येवलेवाडी परिसरात पाणीटंचाई असताना टिळेकरनगरमधील अवैध नळजोडणीमुळे पाण्याची गळती होत आहे. या पाणीगळतीमुळे संपूर्ण रस्ता जलमय झाला आहे. नागरिकांना पाणीपुरवठा सुरळित होत नसताना मात्र, प्रशासनाने केलेल्या दुर्लक्षामुळे या रस्त्यावर पाणीगळती होत आहे.

परिसरात पाणीसंकट निर्माण झाले असून नागरिकांच्या सातत्याने तक्रारी येत आहेत. अशातच कोणत्याही ठिकाणी होत असलेली पाणीगळती थांबविल्यास आपोआप पाणीप्रश्न सुटण्यास मदत होईल, असे नागरिकांचे म्हणणे आहे. याठिकाणी होत असलेल्या पाणीगळतीबाबत नागरिकांमध्ये प्रशासनाविषयी मोठ्या प्रमाणांवर नाराजी असून अशा प्रकारची गळती थांबवायला हवी, अशी मागणी नागरिकांतून होत आहे.

खूपवेळा महापालिकेच्या व्हाट्सअप क्रमांकावर आणि ऑनलाईन तक्रार करुनही काहीही कारवाई होताना दिसत नाही. प्रशाससनाकडून अशावेळी दखल घेवून दंड करत कारवाई करण्यात यावी, अशी मागणी रविंद्र वाघ यांनी केली आहे.

संबधित ठिकाणांची पाहणी केली आहे. यावर तत्काळ उपाययोजना करण्यात येतील. तसेच कारवाई करुन त्वरित ही पाणीगळती थांबिवण्यात येईल.

- नितीन खुडे, उपअभियंता, पाणीपुरवठा विभाग

महापालिकेच्या ॲपवर तक्रार दाखल केली आहे पण, टोकन क्रमांकच मिळाला नाही. ही अवैध नळजोडणी सुरूच आहे असून आम्हाला आशा असते की, अशा नळजोडणीवर काही दखल घेवून दंड करण्यात यावा. सर्रास चाललेली अवैध नळजोडणी थांबावी व ह्याला कुठेतरी लगाम लागावा आणि सर्वसामान्य लोकांना समान पाणी मिळावे ही आमची अपेक्षा आहे.

- अभिजीत शाह, अध्यक्ष, थ्री ज्वेल्स सोसायटी