जेजुरी, ता. २० ः जेजुरी शहरातील ग्रामीण रुग्णालयाला गेल्या काही दिवसांपासून पाणी टंचाईची समस्या निर्माण झाली होती. येथील सुवर्णस्टार सोशल क्लबच्यावतीने सुमारे ३५ हजार रुपये खर्चून येथील विंधन विहिरीवरील मोटर व इतर दुरुस्ती करून पाणीपुरवठा सुरू केला. त्यामुळे ग्रामीण रुग्णालयाचा पाणी प्रश्न तात्पुरता मिटला आहे.
ग्रामीण रुग्णालयासाठी टॅंकरने पाणी घ्यावे लागत होते. दवाखान्यात बांधकामाच्या वेळी बोअर घेतली गेली होती. त्याला पाणी सुद्धा मुबलक होते. बांधकाम पूर्ण झाल्यानंतर कॉन्ट्रक्टर त्याची बोअर मोटर घेऊन गेले. सध्या टंचाईमुळे नगरपालिकेचा पाणीपुरवठाही विस्कळीत झाला आहे.
येथील सामाजिक क्षेत्रात काम करणाऱ्या सुवर्णस्टार सोशल क्लबने येथील पाणी टंचाईची दखल घेतली. मंडळाचे अध्यक्ष रज्जाकभाई तांबोळी, अविनाश बारभाई व इतर पदाधिकाऱ्यांनी पाणी टंचाईची माहिती घेत पाठपुरावा सुरू केला. रुग्णालयात विंधन विहीर आहे. मात्र, मोटर नाही, अशी माहिती समोर आली. सुमारे पस्तीस हजार रुपये मोटर, पाइप लाईन, केबल या साहित्यांची जोडणी करून दिली. पाण्याची अडचण मंडळाच्या तत्परतेमुळे दूर झाली. रुग्णालयाच्या वतीने एक छोटा कार्यक्रम ठेवला. या प्रसंगी रुग्णालयाचे वैद्यकीय अधिकारी डॉ. सोनवणे, पवार, मंडळाचे अध्यक्ष रज्जाकभाई तांबोळी, राजूशेठ बारभाई, प्रीतम बारभाई, महेश काळाने, अविनाश बारभाई, दत्ता सकट, बापू खोमणे, रुग्णालयाचे कर्मचारी उपस्थित होते.