पुणे - एमएनजीएल गॅस कनेक्शन बंद करण्याच्या बहाण्याने एका महिलेची पावणेदहा लाख रुपयांची फसवणूक केल्याची घटना समोर आली आहे. या प्रकरणी सिंहगड रस्ता पोलिसांनी गुन्हा दाखल केला आहे.

या प्रकरणी एका महिलेने (वय ५८, रा. गणेशनगर, धायरी) पोलिस ठाण्यात फिर्याद दिली आहे. सायबर चोरट्यांनी फिर्यादी महिलेला मोबाईलवर तुम्ही गॅसचे बिल न भरल्यास कनेक्शन बंद करू, असा संदेश पाठविला. त्यावर महिलेने त्या मोबाईल क्रमांकावर एमएनजीएलच्या कथित अधिकाऱ्याशी संपर्क साधला. त्यावेळी त्याने महिलेला तुम्हाला व्हॉटसॲपवर पाठविलेली एपीके ॲप डाऊनलोड करा, असे सांगितले.

महिलेने ते ॲप डाऊनलोड केल्यानंतर डेबिट कार्डची माहिती भरण्यास सांगितली. त्यानंतर ओटीपी विचारून महिलेच्या बॅंक खात्यातून १७ वेळेस बँक व्यवहार करून नऊ लाख ८० हजार रुपये परस्पर काढून घेतले. फसवणूक झाल्याचे लक्षात आल्यानंतर महिलेने सिंहगड रस्ता पोलिस ठाण्यात तक्रार दिली.