भोर - तालुक्यातील शासनाच्या १०८ क्रमांकाच्या रुग्णवाहिकेतील वैद्यकीय अधिकारी आणि आशा वर्कर यांनी मंगळवारी (ता. २४) पहाटे महिलेची रुग्णवाहीकेतच प्रसुती करून नवजात बालीकेसह महिलेला जीवदान दिले. वैद्यकीय अधिकारी डॉ. मिलींद कांबळे आणि आशा वर्कर मीना चव्हाण यांचे महिलेच्या नातेवाईंकांनी अभिनंदन केले.

मिळालेल्या माहितीनुसार मंगळवारी पहाटे ५ वाजून ३८ मिनिटांनी १०८ क्रमांकावर पेंजळवाडी (ता. भोर) येथील महिलेस प्रसुतीस घेऊन जाण्यासाठी कॉल आला. त्यावेळी १०८ क्रमांकाची रुग्णवाहीका ही भोर शहरातील उपजिल्हा रुग्णालयात होती. रुग्णवाहीकेचे चालक सचिन राऊत यांच्यासह डॉ. मिलींद कांबळे हे २२ किलोमीटरचे अंतर केवळ २० मिनिटांमध्येच पार करून पेंजळवाडीत पोहोचले.

तेथून गरोदर महिला काजल रंगराव चव्हाण यांना रुग्णवाहीकेमध्ये घेतली आणि रुग्णवाहीका भोंगवली (ता. भोर) येथील प्राथमिक आरोग्य केंद्राकडे निघाली. सद्यस्थितीत पाऊस पडत असल्यामुळे रस्त्यावर पाणी, चिखल आणि खड्डे होते. भोंगवलीच्या प्राथमिक आरोग्य केंद्रावर पोहोचण्यासाठी वेळ लागणार होता.

परंतु महिलेला खूपच तीव्र प्रसुतीवेदना होत असल्यामुळे रुग्णवाहीका रस्त्याच्या कडेला थांबवली. आणि ६ वाजून १४ मिनीटांनी रुग्णवाहीकेतच डॉक्टरांनी तिची सुखरुप प्रसुती केली. त्यांनी एका बालीकेला जन्म दिला असून, नवजात बालिका आणि आई दोन्हीही सुस्थितीत आहेत. प्रसुती सुरळीत झाल्यानतर डॉक्टरांनी तिला भोंगवलीच्या प्राथमिक आरोग्य केंद्रात दाखल केले. महिलेच्या नातेवाईकांनी आणि नागरिकांनी डॉक्टर, आशा वर्कर आणि चालक यांचे अभिनंदन केले.