दौंड : दौंड शहरातील तहसील कचेरीच्या पुरवठा शाखेत प्रभारी कारकून असलेल्या महिलेला अन्य एका महिलेकडून मारहाण करण्यात आली आहे. त्रयस्थ व्यक्तीचा अर्ज घेऊन आलेल्या महिलेच्या कामास नकार दिल्याच्या रागापोटी ही मारहाण करण्यात आली. दौंड पोलिसांनी या बाबत माहिती दिली. प्रभारी कारकून राणी लक्ष्मण कोकणे (वय ३०, रा. खराडी, पुणे) यांना मारहाण झाली आहे. मध्यवर्ती प्रशासकीय इमारतीच्या दुसर्या मजल्यावरील पुरवठा शाखेत दुपारी हा प्रकार घडला. चेतना सोनवणे (रा. दौंड) या महिलेने एका त्रयस्थ व्यक्तीचा अर्ज राणी कोकणे यांच्याकडे आणला होता. त्यावर राणी कोकणे यांनी ज्या व्यक्तीचा अर्ज आहे .

त्यास पाठविण्यास सांगितले असता चेतना सोनवणे हिने टेबलावर आदळआपट करून त्यावरील कागदपत्रे विस्कटली. चेतना सोनवणे हिने कोकणे यांना ` तु लई शहाणपणा करतेस, तुझ्याकडे बघुनच घेते ` , असे म्हणत शिवीगाळ केली. त्यानंतर अंगावर धावून जात मारहाण करून चेतना सोनवणे निघून गेली, असे फिर्यादीत नमूद करण्यात आले आहे.

राणी कोकणे यांच्या फिर्यादीनुसार दौंड पोलिसांनी शासकीय कामात अडथळा आणून मारहाण केल्याप्रकरणी चेतना सोनवणे हिच्याविरूध्द गुन्हा दाखल केला आहे. वरिष्ठांचे अजिबात नियंत्रण नसल्याने दौंड तहसील कचेरी व प्रशासकीय इमारत मधील अन्य काही शासकीय कार्यालयांमध्ये एजंटांचा सुळसुळाट वाढला असून कनिष्ठांना मारहाण करण्यापर्यंत त्यांची मजल गेली आहे.