पुणे : हिंजवडी ते शिवाजीनगर मेट्रो (Hinjewadi to Shivajinagar Metro) प्रकल्पाचे काम ठरलेल्या नियोजनानुसार सुरू आहे. सध्या हिंजवडी, बाणेर, इक्वेअर, यशदा या चार ठिकाणी काम सुरू आहे. विद्यापीठ (University) चौकाच्या परिसरात भूसंपादनाचे काम सुरू आहे, असे पुणे महानगर क्षेत्र विकास प्राधिकरणाने (PMRDA) स्पष्ट केले आहे.

पीएमआरडीतर्फे हिंजवडी ते शिवाजीनगर मेट्रोचे काम सुरू करण्यात आले आहे. हे काम करताना विद्यापीठ चौकात उड्डाणपूल व इतर वाहतूक सुधारणा केल्या जाणार आहे. मात्र, विद्यापीठ चौकात या कामाला गती नसल्याबद्दल नागरिकांनी सोशल मिडियावर प्रश्‍न उपस्थित केले. त्याबाबत पीएमआरडीएचे आयुक्त सुहास दिवसे यांनी स्पष्टीकरण दिले आहे. विद्यापीठ चौकात उड्डाणपुलाचे काम सुरू करण्यापूर्वी दोन्ही बाजूने रुंदीकरण करणे आवश्‍यक आहे. त्यानंतर उड्डाणपुलाचे पिलर टाकण्याचे काम करता येईल. वैकुंठ मेहता संस्थेच्या बाजूचे काम झाले असून, मॉडर्न महाविद्यालयाच्या बाजूचे काम सुरू आहे.

बाणेर, हिंजवडी, इक्वेअर, यशदा असा चार ठिकाणावरून काम सुरू आहे. अलाईनमेंटमध्ये कोणताही बदल नाही. हळूहळू प्रत्यक्षात काम दिसण्यास सुरवात होईल. प्रत्यक्षात काम दिसत नसले म्हणजे काम बंद झाले असे नाही तर इतर अनेक पूरक कामे सुरू आहेत, असे दिवसे यांनी सांगितले.