मुंबई - एचडीएफसी बँक व बँक ऑफ अमेरिका आणि तीन सहकारी बँकांनी नियमभंग केल्यामुळे रिझर्व बँकेने आज त्यांच्यावर आर्थिक दंडाची कारवाई केली. परदेशस्थ भारतीयांकडून ठेवी घेताना नियमांचे उल्लंघन केल्याचा आरोप या दोन मोठ्या बँकांवर होता. त्यांना प्रत्येकी दहा हजारांचा दंड झाला आहे.

ही कारवाई करण्यापूर्वी रिझर्व बँकेने या बँकांना कारणे दाखवा नोटीस दिली होती. या बँकांचे म्हणणे ऐकल्यावर हा नियमभंग मोठा असल्याने दंडाच्या शिक्षेची गरज असल्याचा निष्कर्ष काढल्याचे रिझर्व्ह बँकेने म्हटले आहे.

या दोन मोठ्या बँकांबरोबरच धारंगध्रा पीपल्स को-ऑपरेटिव्ह बँकेला एक लाखाचा तर पाटलीपुत्र सेंट्रल को-ऑपरेटिव बँक व मंडल नागरिक सहकारी बँक या दोन बँकांना दीड लाखाचा दंड करण्यात आला आहे. या तीनही बँका गुजरातच्या आहेत.