हिंडेनबर्ग रिसर्चच्या ताज्या अहवालात भारतीय शेअर बाजार नियामक सेबीच्या प्रमुख माधबी पुरी बुच आणि त्यांचे पती धवल बुच यांच्यावर गंभीर आरोप करण्यात आले आहेत.

शनिवारी रात्री उशिरा आलेल्या अहवालात असे म्हटले आहे की, या जोडप्याने कथित 'अदानी मनी' गैरव्यवहारात वापरल्या जाणाऱ्या अस्पष्ट ऑफशोअर फंडात गुंतवणूक केली होती. मात्र, या जोडप्याने यापूर्वीच हे आरोप निराधार असल्याचे म्हटले आहे.

आता अदानी समूहानेही एक निवेदन जारी केले आहे. ते म्हणाले की, हिंडेनबर्गने केलेले नवीन आरोप दुर्भावनापूर्ण, खोडकर आणि दिशाभूल करण्याच्या हेतूने आहेत.

अदानी समूहाचे स्पष्टीकरण

अदानी समूह म्हणाला, "हिंडेनबर्गने केलेले नवे आरोप दुर्भावनापूर्ण आहेत. यासाठी, हिंडेनबर्गने, चुकीच्या हेतूने, सार्वजनिकरित्या उपलब्ध माहितीमधून दिशाभूल करणाऱ्या पद्धतीने निवड केली आहे, तथ्ये आणि कायद्यांकडे दुर्लक्ष केले आहे आणि वैयक्तिक लाभ मिळविण्यासाठी हे सर्व केले आहे."

यामध्ये पुढे म्हटले की, "आम्ही अदानी समूहावर केलेले आरोप पूर्णपणे फेटाळतो. हे आरोप करण्यासाठी आधीच्या खोट्या दाव्यांचा पुन्हा एकदा वापर केला आहे. आमच्यावर गेल्या वेळी करण्यात आलेले सर्व आरोप सर्वोच्च न्यायालयाने या वर्षी जानेवारीतच फेटाळले आहेत."

हिंडेनबर्गचे नवे आरोप

हिंडेनबर्गने जारी केलेल्या नवीन अहवालात म्हटले आहे की, "अदानी समूहाच्या आमच्या मूळ अहवालाला जवळपास १८ महिने उलटून गेले आहेत. भारतीय व्यावसायिक समूह (अदानी) कॉर्पोरेट इतिहासातील सर्वात मोठ्या घोटाळ्यात सहभागी असल्याचे भरपूर पुरावे सादर केले गेले आहेत. तरीही ठोस पुरावे आणि 40 हून अधिक स्वतंत्र मीडिया तपास असूनही, SEBI ने अदानी समूहाविरुद्ध कारवाई केली नाही. कारवाई करण्याऐवजी, SEBI ने आम्हाला जून 2024 मध्ये 'कारणे दाखवा' नोटीस पाठवली."

हिंडेनबर्गने पुढे म्हटले आहे की, "मॉरिशसमधील अदानी समूहाच्या काळ्या पैशाच्या नेटवर्कची संपूर्ण माहिती देऊनही कारवाई होत नाही. गुप्त दस्तऐवजांचा हवाला देत, हिंडेनबर्ग रिसर्चने म्हटले होते की, सेबीच्या अध्यक्षा आणि त्यांच्या पतीचे अदानी घोटाळ्यात वापरल्या गेलेल्या ऑफशोअर संस्थांमध्ये भागीदारी आहे. या संस्था अदानी समूहाचे अध्यक्ष गौतम अदानी यांचे मोठे बंधू विनोद अदानी चालवतात."