Maggi Sales In India: नेस्लेच्या नूडल्स मॅगीसाठी भारत ही जागतिक स्तरावर सर्वात मोठी बाजारपेठ बनली आहे, तर चॉकलेट वेफर ब्रँड किटकॅटसाठी ही दुसरी सर्वात मोठी बाजारपेठ आहे. नेस्ले इंडियाच्या ताज्या वार्षिक अहवालात ही माहिती देण्यात आली आहे.

याशिवाय, भारतीय बाजारपेठ नेस्लेसाठी दुहेरी अंकी वाढीसह सर्वात वेगाने वाढणारी बाजारपेठ बनली आहे. अहवालानुसार, कंपनीने 2023-24 या आर्थिक वर्षात मॅगीच्या सहा अब्जाहून अधिक सर्व्हिंग्सची विक्री केली, ज्यामुळे भारत जागतिक स्तरावर मॅगीसाठी सर्वात मोठी बाजारपेठ बनली.

भारत ही सर्वात मोठी बाजारपेठ कशी बनली

नेस्ले इंडियाच्या 2023-24 च्या वार्षिक अहवालानुसार, कंपनीचा विस्तार आणि नावीन्य, उत्तम संसाधन वाटप या गोष्टी व्यवसायाला पुढे नेण्यात महत्त्वाच्या ठरल्या आहेत. नेस्ले मॅगी ब्रँड अंतर्गत आपली विक्री वाढवत आहे आणि 10 रुपये किमतीत ओट्स नूडल्स, कोरियन नूडल्स आणि विविध मसालेदार मॅगी नूडल्स लाँच केले आहेत.

किटकॅटनेही केला चमत्कार

नेस्ले इंडियाने सांगितले की त्यांनी किटकॅटचे ​​4.20 कोटी 'फिंगर्स' विकले. नवीन उत्पादने, वितरण नेटवर्कचा विस्तार आणि नाविन्यपूर्ण ब्रँड्समुळे ही वाढ झाली आहे. नेस्ले इंडियाने 31 मार्च 2024 पर्यंत गेल्या 15 महिन्यांत 24,275.5 कोटी रुपयांच्या विक्रीचा टप्पा गाठला आहे.

बंदी नंतर मॅगीचा मार्केट शेअर घसरला

आज, कंपनीसाठी विक्रमी विक्री करणारी मॅगी 2015 साली एका मोठ्या वादात सापडली होती. आरोग्याच्या कारणास्तव, भारतीय अन्न सुरक्षा आणि मानक प्राधिकरण (FSSAI) ने जून 2015 मध्ये मॅगी नूडल्सवर 5 महिन्यांसाठी बंदी घातली होती. या बंदीमुळे नेस्ले इंडियाला मोठा फटका बसला होता. बंदीच्या वेळी भारतीय नूडल्स मार्केटमध्ये मॅगीचा वाटा जवळपास 80 टक्के होता. बंदीनंतर महिन्याभरातच तो शून्यावर आला होता.

आता बंदीनंतर जवळपास दशकभरानंतर मॅगीला तिचा दर्जा मिळवून देण्यासाठी धडपड सुरू आहे. या विभागात अनेक कंपन्यांनी प्रवेश केल्याने स्पर्धा तीव्र झाली आहे. गेल्या 8 वर्षांत कंपनीने भारतात सुमारे 140 उत्पादने लॉन्च केली आहेत. याशिवाय 2025 पर्यंत भारतात 7,500 कोटी रुपयांची गुंतवणूक करणार आहे.