नवी दिल्ली : भारतीय रेल्वे केटरिंग अँड टुरिझम कॉर्पोरेशन म्हणजेच ‘आयआरसीटीसी’ने आर्थिक वर्ष २०२४च्या जानेवारी ते मार्च या चौथ्या तिमाहीत २८४ कोटी रुपयांचा निव्वळ नफा मिळवला असून, वार्षिक आधारावर त्यात दोन टक्क्यांनी वाढ झाली आहे. एक वर्षापूर्वी याच तिमाहीत कंपनीला २७८ कोटी रुपये नफा झाला होता.

कंपनीने आर्थिक वर्ष २०२४ साठी प्रति शेअर चार रुपयांचा अंतिम लाभांश जाहीर केला आहे. संपूर्ण आर्थिक वर्ष २०२४ साठी कंपनीच्या नफ्यात वार्षिक १० टक्क्यांनी वाढ झाली असून, तो ११११ कोटी रुपये झाला आहे. आर्थिक वर्ष २०२३ मध्ये तो १००५ कोटी रुपये होता.