महान उद्योगपती रतन टाटा यांचे काल रात्री दुःखद निधन झाले. वयाच्या ८६ व्या वर्षी त्यांनी अखेरचा श्वास घेतला. त्यांच्या परोपकारी स्वभावाने आणि माणुसकीने आजवर अनेकांना प्रेरणा दिली आहे. याच त्यांच्या असामान्य गुणांचे एक उदाहरण पुन्हा समोर आले आहे, जेव्हा ते आपल्या माजी कर्मचाऱ्याला भेटण्यासाठी पुण्यात आले होते.

प्रेमाची साक्ष: रतन टाटांनी दिलेला संदेश

रतन टाटांच्या एका माजी कर्मचाऱ्याने दोन वर्षांपासून आजारी असल्याचे कळले, तेव्हा त्यांनी त्वरित निर्णय घेतला. वयाच्या ८३ व्या वर्षी असलेल्या रतन टाटांनी मुंबईहून पुण्यापर्यंत १५० किलोमीटरचा प्रवास कारने केला. कोणतेही प्रसिद्धी माध्यम किंवा बाऊन्सर्स न घेता, ते आपल्या जुन्या कर्मचाऱ्याला भेटायला ‘फ्रेंड्स कॉलनी’ या हौसिंग सोसायटीमध्ये पोहोचले. टाटांचे प्रेम आणि आदर यामुळे त्या कर्मचाऱ्याच्या कुटुंबीयांना आधार मिळाला.

सोशल मीडियावर योगेश देसाई नावाच्या एका व्यक्तीने या घटनेची माहिती दिली आहे. त्यांनी एक फोटो शेअर करून रतन टाटांच्या या भेटीची कथा सांगितली. त्यात म्हटले होते की, "रतन टाटा या भेटीसाठी स्वतः पुण्यात आले, तेही कोणत्याही मीडिया प्रसिद्धीच्या मोहात न अडकता. हे खरे आभिजातपण आहे." त्यांनी जोडले की, "पैसा हा सगळं काही नसतो; माणुसकी, प्रेम आणि आदर यापुढे सर्व काही गौण आहे."

उद्योगजगतासाठी आदर्श-

रतन टाटांचे हे कृत्य केवळ माणुसकीचे नाही, तर एक संदेश आहे की व्यवसायात माणसांची काळजी घ्यायला हवी. कोरोना काळातही त्यांनी उद्योगजगताला आवाहन केले होते की, कर्मचाऱ्यांना नोकरीतून काढू नका. "तेच लोक तुमच्यासाठी आयुष्यभर काम करत होते, आता फक्त थोडी वाईट परिस्थिती आली आहे आणि तुम्ही त्यांना बाहेर काढत आहात, हे तुमच्या मूल्यांचे प्रतिबिंब आहे का?" असा त्यांनी सवाल केला होता.

याआधी २६/११ च्या मुंबईतील ताज हॉटेलवरील दहशतवादी हल्ल्यानंतर रतन टाटांनी आपल्या कर्मचाऱ्यांना मदत केली होती. त्यांनी ८० पीडित कर्मचाऱ्यांच्या कुटुंबीयांना भेटून त्यांचा सर्व खर्च उचलण्याची जबाबदारी घेतली होती. यामुळेच त्यांची माणुसकीची भावना आणि कर्मचारीप्रेम दिसून आले होते.

रतन टाटांचे अजरामर योगदान-

रतन टाटांचे निधन ही केवळ एका महान व्यक्तिमत्त्वाची गमावणी नाही, तर एका अशा व्यक्तीची निरोप आहे, ज्यांनी आपल्या कर्मचाऱ्यांवर केवळ व्यवसायासाठी नव्हे, तर माणुसकीच्या नात्याने प्रेम केले. त्यांच्या या कृतीतून उद्योगजगताने आणि समाजाने माणुसकी, निष्ठा आणि आदर यांचे महत्त्व शिकले पाहिजे.