Bank Licence Cancelled: रिझर्व्ह बँक ऑफ इंडिया (RBI) कडून बँकांवर कठोर कारवाई केली जात आहे. दोन दिवसांपूर्वी उत्तर प्रदेशातील एका बँकेचा परवाना रद्द केल्यानंतर आरबीआयने बुधवारी आणखी एका बँकेचा परवाना रद्द केला आहे. 19 जून 2024 पासून बँकेचे कामकाज बंद झाले आहे. म्हणजेच 20 जूनला सकाळी बँकेत जाणाऱ्यांना खात्यातून पैसे काढता येणार नाहीत. यावेळी मुंबईच्या सिटी को-ऑपरेटिव्ह बँक लिमिटेडचा परवाना रिझर्व्ह बँकेने रद्द केला आहे.

DICGC कडून 5 लाख रुपये मिळण्याचा अधिकार

आरबीआयने दिलेल्या माहितीत, महाराष्ट्राचे सहकार आयुक्त आणि निबंधक यांना बँक बंद करण्याचे आदेश जारी करून त्यासाठी लिक्विडेटरची नियुक्ती करण्यास सांगण्यात आल्याचे म्हटले आहे. बँक बंद झाल्यास, प्रत्येक खातेदाराला ठेव विमा आणि क्रेडिट गॅरंटी कॉर्पोरेशन (DICGC) कडून 5 लाख रुपये मर्यादेपर्यंतच्या ठेवींच्या ठेव विमा दाव्याची रक्कम प्राप्त करण्याचा अधिकार असेल.

रिझर्व्ह बँकेने सांगितले की, एकूण विमा उतरवलेल्या ठेवींपैकी 230.99 कोटी रुपये आधीच दिले गेले आहेत. मुंबईस्थित सहकारी बँकेकडे पुरेसे भांडवल आणि कमाईची क्षमता नसल्याचे रिझर्व्ह बँकेने म्हटले आहे.

बँकेचा कारभार असाच सुरू राहिल्यास लोकांवर विपरित परिणाम होईल

मध्यवर्ती बँकेने म्हटले आहे की, सध्याच्या आर्थिक स्थितीमुळे बँक आपल्या खातेधारकांना पूर्ण पेमेंट करू शकणार नाही. बँकेला आपले कामकाज पुढे चालू ठेवण्यास परवानगी दिल्यास त्याचा लोकांवर विपरीत परिणाम होईल. बँकेचा परवाना रद्द केल्यामुळे, सिटी को-ऑपरेटिव्ह बँकेला बँकिंगचा व्यवसाय करण्यास मनाई करण्यात आली आहे.