SEBI Action: सिक्युरिटीज अँड एक्स्चेंज बोर्ड ऑफ इंडिया (SEBI) ने अलीकडेच मोहम्मद नसीरुद्दीन अन्सारीवर कारवाई केली आहे. गुंतवणुकीचा सल्ला दिल्याबद्दल 17.2 कोटी रुपये परत करण्याचे निर्देश त्याला दिले आहेत.

सोशल मीडियावर शेअर बाजारातील तज्ज्ञ असल्याचा दावा करणाऱ्या आणि शेअर बाजारात गुंतवणुकीचा सल्ला देणाऱ्या इन्फ्लुएंसरवर सेबी बारकाईने लक्ष ठेवून आहे.

'X' (पूर्वीचे ट्विटर) आणि 'टेलीग्राम' वर लोकांना शेअर बाजारात गुंतवणुकीचा सल्ला देणारे 'बाप ऑफ चार्ट' म्हणून ओळखला जाणारा फायनान्सर मोहम्मद नसीरुद्दीन अन्सारी याच्यावर सेबीने कारवाई केली आहे. याशिवाय, गुंतवणूक सल्लागारांना अनधिकृत सल्ला देणाऱ्या आणखी दोन संस्थांना शेअर बाजारात व्यवसाय करण्यापासून सेबीने थांबवले आहे.

'बाप ऑफ चार्ट्स' चे YouTube वर 443,000 पेक्षा जास्त फॉलोवर्स आहेत आणि X (पूर्वीचे Twitter) वर 83,000 फॉलोअर्स आहेत. सेबीने दावा केला आहे की मोहम्मद नसीरुद्दीन अन्सारी हे शैक्षणिक अभ्यासक्रमांच्या नावाखाली व्यावसायिक सल्ला देत होते आणि त्यांच्याकडून शुल्क आकारत होते.

SEBI च्या तपासात असे समोर आले आहे की मोहम्मद नसीरुद्दीन अन्सारी याला जानेवारी 2021 ते जुलै 2023 या कालावधीत 2.89 कोटी रुपयांचा निव्वळ तोटा झाला आहे.

सेबीच्या म्हणण्यानुसार, नसीरुद्दीन अन्सारी वेगवेगळ्या सोशल मीडिया प्लॅटफॉर्मवर स्वत:ला स्टॉक मार्केट एक्सपर्ट म्हणून सांगायचा.

तो गुंतवणूकदारांना शेअर बाजाराशी संबंधित त्याच्या स्वत:च्या शैक्षणिक अभ्यासक्रमात प्रवेश घेण्यास सांगत असे. तसेच गुंतवणूकदारांना भरघोस नफा मिळेल या विश्वासाने शेअर बाजारात गुंतवणूक करण्यास सांगितले.

सोशल मीडिया फायनान्स इन्फ्लुएंसरच्या सल्ल्याने सामान्य गुंतवणूकदारांचे नुकसान होऊ नये याची खात्री करण्यासाठी, सेबी त्यांच्या विरोधात कारवाई करत आहे.