नवी दिल्ली : मजबूत मागणी आणि तंत्रज्ञानातील गुंतवणूक यामुळे देशातील सेवा क्षेत्राने जुलैमध्ये उत्तम कामगिरी केली आहे. जूनच्या तुलनेत वाढीचा वेग थोडासा कमी झाला असला, तरीही सेवा क्षेत्राची वाढ लक्षणीय असल्याचे एचएसबीसी इंडियाने मासिक सर्वेक्षण अहवालात म्हटले आहे.

जुलैमध्ये सर्व्हिसेस बिझनेस ॲक्टिव्हिटी इंडेक्स ६०.३ असून, जूनमधील ६०.५ वरून तो अंशतः कमी झाला आहे. जुलैमध्ये सेवा क्षेत्रातील उलाढाली किंचित मंद गतीने वाढल्या. प्रामुख्याने देशांतर्गत मागणीमुळे नव्या व्यवसायात वाढ झाली आहे.

आगामी काळाबाबत सेवा कंपन्या पुढील वर्षाच्या दृष्टिकोनाबद्दल आशावादी आहेत, असे एचएसबीसीचे भारतातील मुख्य अर्थतज्ज्ञ प्रांजुल भंडारी म्हणाले. जगभरातून भारतीय सेवांच्या मागणीत वाढ होत असून, ऑस्ट्रिया, ब्राझील, चीन, जपान, सिंगापूर, नेदरलँड आणि अमेरिका या देशांमधून मोठी मागणी आहे.

अनुकूल आर्थिक परिस्थितीमुळेही सेवा कंपन्यांमध्ये कर्मचारीभरती वाढत आहे, असेही या अहवालात म्हटले आहे. किंमतीच्या आघाडीवर, उच्च वेतन आणि भौतिक खर्चामुळे व्यावसायिक खर्चात वाढ होत आहे. सात वर्षांसाठी सेवांच्या तरतुदीसाठी आकारल्या जाणाऱ्या किमतींमध्ये सर्वाधिक वाढ होण्यास खर्चाचा दबाव आणि सकारात्मक मागणीचा कल कारणीभूत ठरला.