मुंबई : व्होडाफोन आयडियाच्या ‘एफपीओ’मध्ये आज शेवटच्या दिवसाअखेर जवळपास सात पटीने अधिक मागणी झाली आहे. आज शेवटच्या दिवशी गुंतवणूकदारांनी आठ हजार कोटी रुपयांच्या शेअरसाठी अर्ज केले. हा ‘एफपीओ’ अठरा हजार कोटी रुपयांचा असून, पात्र संस्थात्मक गुंतवणूकदारांनी त्यांच्या राखीव कोट्याच्या साडेसतरा पट शेअरसाठी अर्ज केले आहेत, तर बिगर संस्थात्मक गुंतवणूकदारांनी चार पट जास्त अर्ज केले आहेत.

छोट्या गुंतवणूकदारांनी जेमतेम ९१ टक्के शेअरसाठी अर्ज केले. यापूर्वीच संस्थात्मक गुंतवणूकदारांनी अकरा रुपयांच्या किमतीला पाच हजार चारशे कोटी रुपयांचे शेअर खरेदी केले आहेत. या रकमेपैकी १२ हजार ७०० कोटी रुपये खर्चूनकंपनी फोर-जी व फाइव्ह-जी नेटवर्कचे सक्षमीकरण करणार आहे. व्होडाफोन-आयडियाचा शेअर आज १२.९० रुपयांवर बंद झाला.

भागधारकांची संख्या ४० लाखांवर

व्होडाफोन-आयडिया या देशातील मोठ्या दूरसंचार कंपनीच्या भागधारकांची संख्या आता ४० लाखांचा टप्पा ओलांडणार आहे. सध्या कंपनीच्या ‘एफपीओ’मध्ये गुंतवणूक सुरू आहे. त्यापूर्वी त्यांचे देशातील एक हजार लहान-मोठ्या शहरांमध्ये ३८ लाख १८ हजार भागधारक होते. आता आणकी ३.५ लाख अर्ज आले आहेत. व्होडाफोनच्या एकूण भागधारकांमध्ये साडेसहा टक्के बडे वैयक्तिक गुंतवणूकदार असून, या तीस हजार गुंतवणूकदारांकडे प्रत्येकी सरासरी सुमारे एक लाखाहूनही जास्त शेअर आहेत.