नवी दिल्ली : नव्या आर्थिक वर्षातील पहिल्या तिमाहीसाठी अल्पबचत योजनांचे दर ‘जैसे थे’ राहतील, असे सरकारने आज जाहीर केले. एक एप्रिल २०२४ पासून सुरू होणाऱ्या आणि ३० जून २०२४ रोजी संपणाऱ्या नव्या आर्थिक वर्षातील पहिल्या तिमाहीसाठी अल्पबचत योजनांचे व्याजदर चालू आर्थिक वर्षाच्या एक जानेवारी २०२४ ते ३१ मार्च २०२४ पर्यंतच्या चौथ्या तिमाहीसाठी अधिसूचित केलेल्या व्याजदरांप्रमाणेच राहतील, असे अर्थ मंत्रालयाच्या अधिसूचनेत म्हटले आहे.

या अधिसूचनेनुसार, सुकन्या समृद्धी योजनेतील ठेवींवर ८.२ टक्के व्याज मिळेल, तर तीन वर्षांच्या मुदत ठेवीवरील दर ७.१ टक्के राहील. पीपीएफ आणि बचत ठेवींवरील व्याजदरदेखील अनुक्रमे ७.१ टक्के आणि चार टक्के राहील. किसान विकास पत्रावरील व्याजदर ७.५ टक्के असेल आणि गुंतवणूक ११५ महिन्यांत परिपक्व होईल.

राष्ट्रीय बचत प्रमाणपत्रासाठी (एनएससी) व्याजदर ७.७ टक्के राहील. मासिक उत्पन्न योजनेसाठी ७.४ टक्के दर राहील. सरकार दर तिमाहीला अल्पबचत योजनांवरील व्याजदर अधिसूचित करते.