Share Market Opening 13 July 2023: भारतीय शेअर बाजाराची आजची वाटचाल चांगल्या गतीने होत आहे. देशांतर्गत बाजारातील गुंतवणूकदारांनी केलेल्या चांगल्या खरेदीच्या आधारावर, बाजार तेजीत आहे आणि निफ्टी 19,500 च्या अगदी जवळ उघडला आहे. मेटल आणि ऑटो शेअर्समध्ये वाढ झाल्याने बाजाराला पाठिंबा मिळत आहे.

आज शेअर बाजारात बीएसईचा निर्देशांक सेन्सेक्स 73.17 अंकांच्या म्हणजेच 0.42 टक्क्यांच्या वाढीसह 65,667 च्या पातळीवर उघडला. दुसरीकडे, NSE चा निफ्टी 110.90 अंकांच्या म्हणजेच 0.57 टक्क्यांच्या वाढीसह 19,495.20 च्या पातळीवर उघडला.

सेन्सेक्स आणि निफ्टीच्या शेअर्सची स्थिती

सेन्सेक्समधील 30 शेअर्सपैकी 25 शेअर्समध्ये तेजी दिसून येत आहे. यामध्ये फक्त 5 शेअर्स आहेत जे घसरले आहेत. याशिवाय निफ्टीच्या 50 शेअर्सपैकी 42 शेअर्स तेजीसह व्यवहार करत आहेत आणि 8 शेअर्समध्ये घसरण दिसून येत आहे.

सेन्सेक्सवर 'या' शेअर्समध्ये तेजी:

टाटा स्टील, टीसीएस, एचडीएफसी बँक, महिंद्रा अँड महिंद्रा यांचे शेअर्स बीएसई सेन्सेक्सवर एक टक्क्याहून अधिक वाढीसह व्यवहार करत होते.

त्याचप्रमाणे एसबीआय, बजाज फायनान्स, अॅक्सिस बँक, बजाज फिनसर्व्ह, रिलायन्स इंडस्ट्रीज, इन्फोसिस, कोटक महिंद्रा बँक, जेएसडब्ल्यू स्टील, आयसीआयसीआय बँक आणि अल्ट्राटेक सिमेंट 0.50 टक्क्यांच्या वाढीसह व्यवहार करत होते.

सेन्सेक्सवर 'या' शेअर्समध्ये घसरण:

आज, सेन्सेक्सच्या सुरुवातीच्या व्यापारात एचसीएल टेक सर्वाधिक 1.43 टक्क्यांच्या घसरणीसह व्यवहार करत होता. त्याचप्रमाणे नेस्ले इंडिया, एशियन पेंट्स आणि पॉवरग्रीड शेअर्स घसरणीसह व्यवहार करत होते.

NSE IX वर, GIFT निफ्टी 10.5 अंकांनी किंवा 0.05 टक्क्यांनी घसरून 19,554.50 अंकांवर व्यवहार करत होता. यावरून दलाल स्ट्रीटची सुरुवात आज सपाट राहण्याची शक्यता होती.

'या' कंपन्यांचे तिमाही निकाल आज येणार आहेत

विप्रो, एंजेल वन, फेडरल बँक सारख्या कंपन्या आज त्यांचे तिमाही निकाल जाहीर करतील. याआधी बुधवारी TCS आणि HCL Tech सारख्या कंपन्यांनी त्यांचे पहिल्या तिमाहीचे निकाल जाहीर केले होते.

यामुळे पतंजलीचे शेअर्स घसरले

पतंजली आयुर्वेदाच्या प्रवर्तकाने पतंजली फूड्समधील नऊ टक्के शेअर्स ओएफएसद्वारे विकण्याचा प्रस्ताव दिला आहे. यासाठी 1000 रुपये किंमत निश्चित करण्यात आली आहे. पतंजली फूड्सच्या स्टॉकमध्ये आज 22 टक्क्यांची घसरण झाली.