Share Market Closing Latest Update 14 August 2024: बुधवारी (14 ऑगस्ट) भारतीय शेअर बाजारात चढ-उतारासह व्यवहार दिसून आले. दिवसभर मर्यादित व्यवहार केल्यानंतर शेवटी बाजार वाढीसह बंद झाले. निफ्टी 4 अंकांनी वाढून 24,143 वर बंद झाला. सेन्सेक्स 149 अंकांनी वाढून 79,105 वर बंद झाला आणि निफ्टी बँक 104 अंकांनी घसरून 49,727 वर बंद झाला.

कोणते शेअर्स तेजीत?

आयटी शेअर्सच्या खरेदीमुळे बाजारात ही वाढ दिसून आली आहे. इतर क्षेत्रातील शेअर्सनी गुंतवणूकदारांची निराशा केली. मिडकॅप आणि स्मॉलकॅप शेअर्समध्येही घसरण दिसून आली.

सेन्सेक्समधील 30 शेअर्सपैकी 15 शेअर्स वाढीसह आणि 15 शेअर्स घसरणीसह बंद झाले. निफ्टीच्या 50 शेअर्सपैकी 23 शेअर्स वाढीसह आणि 27 शेअर्स घसरणीसह बंद झाले.

वाढत्या शेअर्समध्ये टीसीएस 2.30 टक्के, एचसीएल टेक 2.09 टक्के, टेक महिंद्रा 1.41 टक्के, इन्फोसिस 1.28 टक्के, महिंद्रा अँड महिंद्रा 1.02 टक्के, भारती एअरटेल 0.85 टक्के, टाटा मोटर्स 0.80 टक्के, एसबीआय 0.78 टक्के, आयटीसी 0.56 टक्के, NTPC 0.29 टक्के, HDFC बँक 0.27 टक्क्यांच्या वाढीसह बंद झाले.

तर अल्ट्राटेक सिमेंट 2.46 टक्के, जेएसडब्ल्यू स्टील 1.85 टक्के, टाटा स्टील 1.81 टक्के, अदानी पोर्ट्स 1.48 टक्के, पॉवर ग्रिड 0.97 टक्के, बजाज फिनसर्व्ह 0.82 टक्के घसरणीसह बंद झाले.

मार्केट कॅपमध्ये मोठी घसरण

आजच्या व्यवहारात सेन्सेक्स-निफ्टीमध्ये वाढ झाली असली तरी इतर क्षेत्रातील घसरण आणि मिड कॅप, स्मॉल कॅपमध्ये घसरण झाली आहे. बीएसईवर शेअर्सचे मार्केट कॅप 72,000 कोटी रुपयांनी घसरले आणि 444.58 लाख कोटी रुपयांवर बंद झाले, जे मागील सत्रात 445.30 लाख कोटी रुपये होते. गुंतवणूकदारांच्या संपत्तीत सुमारे 72,000 कोटी रुपयांची घट झाली आहे.

बॉम्बे स्टॉक एक्स्चेंज (BSE) वर आज एकूण 4,036 शेअर्सचे व्यवहार झाले. यापैकी 1,531 शेअर्स वाढीसह बंद झाले. 2,391 शेअर्समध्ये घसरण दिसून आली. तर 114 शेअर्स कोणतेही चढ-उतार न होता बंद झाले. याशिवाय आजच्या व्यवहारादरम्यान 178 शेअर्सनी त्यांच्या 52 आठवड्यांचा उच्चांक गाठला. तर 66 शेअर्सनी त्यांच्या नवीन 52 आठवड्यांच्या नीचांकी पातळीला स्पर्श केला.