Reliance Share Price: गेल्या आठवड्यात शेअर बाजारात घसरण पाहायला मिळाली. बाजारातील घसरणीचा परिणाम सर्वच कंपन्यांच्या मार्केट कॅपवर झाला आहे. शुक्रवारीही बाजार घसरणीसह बंद झाला होता.

सध्या बाजारात घसरण दिसून येत आहे. इक्विटी मार्केटमधील कमकुवत ट्रेंडमुळे गेल्या आठवड्यात टॉप 10 सर्वात मूल्यवान देशांतर्गत कंपन्यांपैकी सहा कंपन्यांचे बाजार भांडवल एकत्रितपणे 1,02,280.51 कोटी रुपयांनी घसरले.

यादरम्यान मुकेश अंबानींच्या रिलायन्स इंडस्ट्रीजला सर्वाधिक फटका बसला. मागील आठवड्यात बीएसई सेन्सेक्स 405.21 अंकांनी किंवा 0.63 टक्क्यांनी घसरला होता.

टॉप 10 कंपन्यांपैकी रिलायन्स इंडस्ट्रीज, ICICI बँक, हिंदुस्थान युनिलिव्हर, ITC, Infosys आणि SBI यांच्या बाजार मूल्यांकनात घसरण होऊन कंपन्यांचे नुकसान झाले आहे.

या कंपन्यांचा झाला फायदा

टाटा कन्सल्टन्सी सर्व्हिसेस (TCS), एचडीएफसी बँक, एचडीएफसी आणि भारती एअरटेलचे मूल्यांकन वाढले.

रिलायन्स इंडस्ट्रीजचे बाजार भांडवल 40,695.15 कोटी रुपयांनी घसरून 17,01,720.32 कोटी रुपये झाले. हिंदुस्तान युनिलिव्हरचे बाजार भांडवल 17,222.5 कोटी रुपयांनी घसरून 6,20,797.26 कोटी रुपये झाले.

एसबीआयचेही नुकसान

एसबीआयचे बाजार भांडवल 14,814.86 कोटी रुपयांनी घसरले आणि ते 4,95,048.22 कोटी रुपये राहिले. दुसरीकडे, HDFC बँकेने बाजार भांडवलात 23,525.6 कोटी रुपयांची भर घातली आणि तिचे बाजार भांडवल 9,18,984.17 कोटी रुपये झाले.

शेअर्समध्ये घसरण:

रिलायन्स इंडस्ट्रीजच्या शेअर्समध्ये सातत्याने घसरण होत आहे. बाजारातील घसरणीदरम्यान रिलायन्स इंडस्ट्रीजच्या शेअर्समध्येही घसरण दिसून आली. गेल्या पाच दिवसांत रिलायन्सच्या शेअरमध्ये 48 अंकांपेक्षा जास्त घसरण झाली आहे.

गेल्या शुक्रवारीही हा शेअर 17 अंकांपेक्षा अधिक घसरणीसह बंद झाला होता. रिलायन्सचा शेअर 2,517.80 रुपयांच्या पातळीवर खाली आला आहे. शेअर घसरल्याने गुंतवणूकदारांचेही नुकसान झाले आहे.