Stock Market Crash: देशांतर्गत शेअर बाजारात विक्री दिसून येत आहे. रिलायन्स इंडस्ट्रीज आणि एचडीएफसी बँकेच्या मोठ्या घसरणीमुळे सेन्सेक्स 800 हून अधिक अंकांनी घसरून 66,728 च्या नीचांकी पातळीवर आला. सेन्सेक्स आणि निफ्टी दोन्ही जवळपास 1.25 टक्क्यांच्या घसरणीसह व्यवहार करत आहेत.

बाजारातील घसरणीमागील प्रमुख कारण म्हणजे बँक निफ्टीतील घसरण. आजच्या व्यवहारात, बँक निफ्टी 703 अंकांनी घसरला होता आणि सध्या तो 45,390 पर्यंत म्हणजेच 45,400 च्या खाली पोहोचला आहे.

गुंतवणूकदारांचे तीन लाख कोटी रुपयांपर्यंत नुकसान झाले

मार्केट कॅपमध्ये मोठी घसरण दिसून येत असून 18 सप्टेंबर रोजी भारतीय शेअर बाजाराचे मार्केट कॅप 3,23,00,115.59 कोटी रुपये होते आणि आज ते 3,20,43,114.30 कोटी रुपयांवर आले आहे. याचा अर्थ आजच्या ट्रेडिंग सत्रात मार्केट कॅपमध्ये आतापर्यंत 3 लाख कोटी रुपयांहून अधिकची घसरण दिसून आली आहे.

रिलायन्सचे शेअर्स का पडत आहेत?

आजच्या व्यवहारात, रिलायन्स इंडस्ट्रीजचा शेअर 3 टक्क्यांनी घसरला आणि 2,355 रुपयांच्या दोन महिन्यांच्या नीचांकी पातळीवर आला. आज एक्स्चेंजवर 2 कोटी शेअर्सची खरेदी-विक्री झाली, तर एका महिन्याची सरासरी दैनंदिन उलाढाल 73 लाख शेअर्सची होती.

गेल्या आठवड्यात देशांतर्गत कच्च्या तेलाच्या विक्रीवरील विंडफॉल टॅक्स 10,000 रुपये प्रति टन वाढवण्याच्या सरकारने घेतलेल्या निर्णयामुळेही शेअर्सवर परिणाम झाला आहे.

सेन्सेक्सवर, एचडीएफसी बँक, आरआयएल, जेएसडब्ल्यू स्टील, मारुती आणि अल्ट्राटेक सिमेंटच्या शेअर्समध्ये सर्वाधिक नुकसान झाले. एचडीएफसी बँकेने सोमवारी सांगितले की, एचडीएफसीमध्ये विलीन झाल्यानंतर बँकेच्या नॉन-परफॉर्मिंग मालमत्तेत वाढ होऊ शकते. त्यामुळे आज या शेअरमध्ये तीन टक्क्यांपर्यंत घसरण दिसून आली.