Share Market Closing Latest Update 8 February 2024: आरबीआय एमपीसीच्या बैठकीनंतर बाजारात चौफेर विक्री झाली. बँकिंग, वाहन आणि इतर क्षेत्रातील शेअर्स घसरणीसह बंद झाले. सेन्सेक्स जवळपास 700 अंकांनी घसरला आणि 71,450 च्या जवळ बंद झाला. निफ्टीही जवळपास 200 अंकांनी घसरला आणि 21,700च्या पातळीवर बंद झाला.

क्षेत्रीय निर्देशांकाची स्थिती

आजच्या सत्रात बँकिंग शेअर्सच्या घसरणीमुळे निफ्टी बँक निर्देशांक मोठ्या घसरणीसह बंद झाला. निफ्टी बँक 1.76 टक्क्यांच्या घसरणीसह 45012 वर बंद झाला. निफ्टी बँकेच्या 12 शेअर्सपैकी 9 शेअर्स घसरणीसह बंद झाले. खाजगी बँकांच्या शेअर्समध्ये मोठी घसरण झाली तर सार्वजनिक क्षेत्रातील बँकांचे शेअर्स वाढीसह बंद झाले.

याशिवाय ऑटो, एफएमसीजी, मेटल आणि कंझ्युमर ड्युरेबल्स क्षेत्रातील शेअर्स घसरले. तेल, ऊर्जा, मीडिया, आयटी क्षेत्रातील शेअर्स वाढीसह बंद झाले. आजच्या व्यवहारात निफ्टी मिड कॅप निर्देशांक किंचित वाढीसह बंद झाला तर स्मॉल कॅप निर्देशांक घसरणीसह बंद झाला.

सेन्सेक्समधील 30 शेअर्सपैकी 8 शेअर्स वधारले आणि 22 शेअर्स घसरले. निफ्टीच्या 50 शेअर्सपैकी 14 शेअर्स वाढीसह आणि 36 शेअर्स घसरणीसह बंद झाले.

कोणते शेअर्स घसरले?

आज पुन्हा पेटीएमच्या शेअर्समध्ये 9 टक्क्यांची घसरण झाली, तर आयटीसी आणि ब्रिटानियाचे शेअर 4 टक्क्यांनी घसरले. भारतातील सर्वात मोठी विमा कंपनी LIC चे शेअर्स 9 टक्क्यांनी वाढले आहेत.

पंतप्रधान नरेंद्र मोदी यांनी काल राज्यसभेत एलआयसीचे कौतुक केले होते. गुरुवारी, एलआयसीचे शेअर्स 9.5 टक्क्यांनी वाढून 1144 रुपयांच्या पातळीवर पोहोचले आणि पहिल्यांदाच एलआयसीचे मार्केट कॅप 7 लाख कोटी रुपयांच्या पुढे गेले.

गुंतवणूकदारांच्या संपत्तीत 53,000 कोटी रुपयांची घसरण

आजच्या व्यवहारात, बाजारातील विक्रीमुळे कंपन्यांच्या मार्केट कॅपमध्ये घसरण झाली आहे. बीएसईवर कंपन्यांचे मार्केट कॅप 388.72 लाख कोटी रुपये आहे. मागील व्यापार सत्रात मार्केट कॅप 389.25 लाख कोटी रुपये होते. आजच्या व्यवहारात गुंतवणूकदारांच्या संपत्तीत 53,000 कोटी रुपयांची घसरण झाली.