वहागाव : टोल भरण्याच्या कारणावरून महामार्गावरील (Banglore Highway) तासवडे (ता. कऱ्हाड) येथील टोलनाक्यावर (Tasawade Toll Plaza) खासगी बस प्रवासी व टोल कर्मचारी यांच्यात जोरदार धुमश्चक्री झाली. रविवारी रात्री सव्वादहा वाजण्याच्या सुमारास झालेल्या या घटनेवरून तळबीड पोलिसांत परस्परविरोधी तक्रारी दाखल झाल्या असून, त्यानुसार 12 ते पंधरा जणांविरुद्ध गुन्हा दाखल झाला आहे.

कोल्हापूर येथून साखरपुड्याचा कार्यक्रम झाल्यानंतर पुण्याच्या दिशेने निघालेल्या ट्रव्हल्सचा टोल भरण्यावरुन हा राडा झाला असल्याची माहिती आहे. फास्टॅग स्कॅनिंग होत नसल्याने बाचाबाचीतून हा वाद मोठा झाल्याची माहिती आहे. 26 तारखेच्या पहाटे टोल नाक्यावरील झालेल्या या राड्याचा व्हिडिओ समाज माध्यमातून मोठ्या प्रमाणावर व्हायरल झाला आहे. याबाबतची तक्रार तळबीड पोलीस ठाण्यात दाखल करण्यात आलीय.