सातारा : विद्यार्थ्यांच्या आधार कार्डची दुबार नोंदणी करण्यात आल्यामुळे एकाच विद्यार्थ्याला दुसऱ्यांदा लाभ मिळाल्याचे पुढे आले आहे. त्यामुळे येत्या ३१ मार्चपर्यंत सर्वच शाळांना कोरोना काळातही आधार नोंदणी करण्याची सक्ती शासनाच्या शालेय शिक्षण विभागामार्फत करण्यात आली आहे.

राज्यात सर्वत्र शिक्षण विभागाचे कामकाज सरल प्रणालीतून सुरु झाले आहे. या प्रणालीत नोंदणी करताना विद्यार्थ्यांचे आधार क्रमांक आवश्यक असल्याच्या सूचना शाळांना देण्यात आल्या होत्या. त्या नोंदी करताना शाळांकडून काही चुकीचे तर काही ठिकाणी एकाच आधार क्रमांकांची दोन वेळा नोंदणी झाल्याने एकाच विद्यार्थ्यांला दोन वेळा लाभ मिळाला आहे. त्यामुळे येत्या ३१ मार्चपर्यंत सर्व शाळांना आधार नोंदणी करण्याच्या सूचना राज्याच्या शालेय शिक्षण विभागाने दिल्या आहेत.

एक माणूस म्हणून स्त्रीच्या मानसिक आरोग्याची काळजी घ्यायला हवी!

शालेय शिक्षण व क्रीडा विभागामार्फत विद्यार्थ्यांना शालेय पोषण आहार, राजीव गांधी अपघात सानुग्रह अनुदान योजना, मोफत गणवेश योजना, मोफत पाठ्यपुस्तक योजनेचा लाभ दिला जातो. या योजनेचा लाभ देताना शासनाकडे लाभास अनुदेय विद्यार्थ्यांची परिपूर्ण माहिती शिक्षण विभागाच्या सरल संकेतस्थळावर उपलब्ध असण्याच्या दृष्टीने आणि संबंधित लाभाचे दुबार प्रदान रोखण्यासाठी सर्व विद्यार्थ्यांचे आधार क्रमांक शिक्षण विभागाच्या सरल प्रणालीत नोंदविणे आवश्यक आहे. 

पोलिस दाम्पत्याची जाबाज कामगिरी, कोरोनावर ठरली भारी!

कोरोनाच्या पार्श्वभूमीवर शाळा सुरु होईपर्यंत आधार नोंदणी करता उपलब्ध असलेल्या पर्यायी व्यवस्थेचा वापर करुन पहिली ते बारावीच्या विद्यार्थ्यांचे आधार नोंदणी आणि सरलमध्ये अद्ययावतीकरण करण्याचे काम शाळांनी ३१ मार्च २०२१ पर्यंत पूर्ण करण्याचे आदेश शासनाने प्राथमिक व माध्यमिक शिक्षणाधिकाऱ्यांना दिले आहेत. अद्यापही विद्यार्थ्यांचे आधार क्रमांक सरल प्रणालीत नोंदविणे प्रलंबित आहे. काही विद्यार्थ्यांची दुबार नोंदणी झाल्याचे शासनाच्या लक्षात आले आहे. काही अस्तित्वात नसलेले आधार क्रमांक नोंदणी झाल्याचे दिसून आले आहे. या सर्व बाबीवर आळा घालण्यासाठी सर्व मुलांचे आधार क्रमांक नोंदवून त्याची खात्री होणे आवश्यक आहे. दरम्यान, जिल्ह्यातील सर्व शाळांना विद्यार्थ्यांची आधार कार्ड नोंदणी सरल प्रणालीवर करण्याच्या सूचना देण्यात आल्या आहेत. त्यानुसार शाळांच्या मुख्याध्यापकांकडून आढावा घेण्यात येत असल्याचे माध्यमिक शिक्षणाधिकारी राजेश क्षीरसागर यांनी सांगितले.