मोरगिरी : पाटण कृषी उत्पन्न बाजार समिती विरोधकांच्या ताब्यात आहे. संस्थेचा उपयोग राजकीय फायद्यासाठी करायचा एवढाच कारभार विरोधकांनी केला असून, शेतकऱ्यांना त्याचा फायदा झाला नाही. बाजार समितीच्या निवडणुकीत परिवर्तन करण्यासाठी देसाई गट पूर्ण ताकदीनिशी उतरणार असल्याचे प्रतिपादन पालकमंत्री शंभूराज देसाई यांनी केले.

दौलतनगर (ता. पाटण) येथे कृषी उत्पन्न बाजार समिती निवडणुकीच्या निमित्ताने आयोजिलेल्या मेळाव्यात ते बोलत होते. या वेळी लोकनेते बाळासाहेब देसाई सहकारी साखर कारखान्याचे अध्यक्ष यशराज  देसाई, मोरणा शिक्षण संस्थेचे अध्यक्ष रविराज  देसाई, जयराज देसाई, शिवसेनेचे जिल्हाप्रमुख जयवंतराव  शेलार, डॉ. दिलीपराव चव्हाण

अशोकराव पाटील, अभिजित पाटील, बबनराव शिंदे, शिवशाही सरपंच संघाचे अध्यक्ष विजय शिंदे, बबनराव भिसे, जालंदर पाटील, ग्रामपंचायत सदस्य, विकास सेवा सोसायटी सदस्य, व्यापारी, सरपंच, उपसरपंच यांची  प्रमुख  उपस्थिती  होती.

पालकमंत्री देसाई म्हणाले, ‘‘शेतकऱ्यांच्या शेतमालाची विक्री करणारी मध्यवर्ती संस्था म्हणून राज्यात कृषी उत्पन्न बाजार समिती कार्यरत आहे. कृषी उत्पन्न बाजार समितीच्या माध्यमातून शेतकऱ्यांच्या शेतमालाला जादा उत्पन्न मिळते.

पाटण कृषी उत्पन्न बाजार समिती विरोधकांच्या ताब्यात आहे. जिल्ह्याचे सुपुत्र मुख्यमंत्री एकनाथ शिंदे यांच्या काळात मिळालेल्या सत्तेच्या संधीचा फायदा शेतकऱ्यांना करून देण्यासाठी कृषी बाजार समितीत परिवर्तन घडवून आणावे.’’ या निवडणुकीमध्ये परिवर्तन करण्यासाठी देसाई गटाचा कार्यकर्ते जिद्दीला पेटला, तर विजय मिळवू शकतो, असे देसाई यांनी सांगितले. विजय पवार यांनी प्रास्ताविक केले.