Ajit Pawar :   राष्ट्रवादी काँग्रेसचे अध्यक्ष शरद पवार यांनी मोठे पाऊल उचलत सुप्रिया सुळे आणि प्रफुल्ल पटेल यांना पक्षाचे कार्याध्यक्ष केले. पक्षाच्या 25 व्या स्थापना दिनाच्या समारंभात दिल्लीत पवारांनी ही घोषणा केली. पुतण्या अजित पवार यांच्याबाबत कोणतीही घोषणा झाली नाही. त्यामुळे अजित पवार नाराज असल्याची चर्चा रंगली होती. यावर आज साताऱ्यात अजित पवार यांनी पत्रकार परिषद घेत भूमिका स्पष्ट केली.

अजित पवार म्हणाले, मी नाराज नाही. मला केंद्रातील राजकारणात रस नाही. माझ्यावर राज्यातील विरोधीपक्षनेते पदाची जबाबदारी आहे.

देवेंद्र फडणवीस शरद पवारांचा निर्णय म्हणजे धूळफेक असल्याचे म्हटले होते. यावर अजित पवार म्हणाले, हा आमचा पक्षाअंतर्गत प्रश्न आहे. भाकरी फिरवली हे माध्यमांनी सांगितले. शरद पवार यांनी स्वत: अस काही सांगितले नाही. फडणवीसांनी काय म्हणाव हा त्यांचा अधिकार आहे.

भाजप नेते संपर्कात असल्याच्या प्रश्नावर अजित पवार म्हणाले, माझ्या संपर्कात कोणी नाही. कोणी काम घेऊन आलं तर मी काम करतो. अडीच वर्ष उपमुख्यमंत्री असताना मी पक्षीय अँगलमधून बघायचो नाही. मी कोणतेही काम करत होतो. आम्ही काही एकमेकांचे शत्रू नाही. बाळासाहेब ठाकरे आणि शरद पवार एकमेकांवर टीका करायचे पण ते चांगले मित्र देखील होते.